DNews:31 OCT:సింగరేణి కాలరీస్ కంపెనీ లిమిటెడ్ (SCCL) ఉద్యోగులు, ఆఫీసర్లు నివసించేందుకు వీలుగా 1000 కొత్త క్వార్టర్లను నిర్మించడానికి యాజమాన్యం నిర్ణయం తీసుకుని, రూ. 450 కోట్ల నిధులను మంజూరు చేస్తూ ఉత్తర్వులు జారీ చేసింది. ఈ క్వార్టర్ల నిర్మాణాన్ని రూ. 313.32 కోట్ల అంచనా వ్యయంతో ప్రారంభించనున్నారు. ఈ నిర్మాణాలు జీ+1 విధానంలో చేపట్టనున్నారు. ఆఫీసర్ల కోసం మిలీనియం ఏ, బీ పద్ధతిలో డబుల్, త్రిబుల్ బెడ్రూమ్ తరహా ఇళ్లను, అలాగే సూపర్వైజర్ క్యాడర్, వర్క్మెన్ల కోసం మిలీనియం సీ, డీ బ్లాక్ పద్ధతిలో క్వార్టర్లను నిర్మిస్తారు. ప్రతి బ్లాక్లో నివసించే వారి కోసం గ్రౌండ్ ఫ్లోర్లో పార్కింగ్ సౌకర్యం కల్పించబడుతుంది. ఈ ప్రాజెక్ట్కు జూన్లో డైరెక్టర్ల బోర్డు ఆమోదం తెలపగా, తాజాగా ఫండ్స్ మంజూరయ్యాయి. మొత్తం 1000 క్వార్టర్లలో, ఎన్సీడబ్ల్యూఏ ఉద్యోగుల కోసం 860 క్వార్టర్లు, ఆఫీసర్ల కోసం 140 క్వార్టర్లు నిర్మిస్తారు.
ఈ కొత్త క్వార్టర్ల నిర్మాణం వివిధ ఏరియాలలో ఇలా చేపట్టనున్నారు:
- మంచిర్యాల జిల్లా శ్రీరాంపూర్ ఏరియా: రూ. 193 కోట్లతో 449 క్వార్టర్లు
- పెద్దపల్లి జిల్లా రామగుండం-1 ఏరియా (గోదావరిఖని): రూ. 133 కోట్లతో 318 క్వార్టర్లు
- భూపాలపల్లి జిల్లా కేంద్రం: రూ. 45 కోట్లతో 79 క్వార్టర్లు
- ఖమ్మం జిల్లా మణుగూరు ఏరియా: రూ. 79 కోట్లతో 154 క్వార్టర్లు
కొత్తగా క్వార్టర్లు నిర్మించే ప్రతిపాదిత స్థలాల లేఅవుట్లను ఏర్పాటు చేయాలని సంబంధిత ఆఫీసర్లను సింగరేణి కార్పొరేట్ యాజమాన్యం ఆదేశించింది.