DNews:03 Dec:హైదరాబాద్ యూసఫ్‌గూడలోని కృష్ణకాంత్ పార్కులో 35 మంది నేరస్థులు చెత్త సేకరణ, పార్క్ పరిశుభ్రతలో పాల్గొని సమాజ సేవ చేశారు. వీరు మధురానగర్ పోలీస్‌స్టేషన్ పరిధిలో చిన్నపాటి గొడవలు, ప్రజా శాంతిభద్రతకు హాని కలిగించే చర్యలలో పాల్పడిన నిందితులు.
పోలీసులు పిట్టీ కేసులు నమోదు చేసి నిందితులను అరెస్ట్‌ చేసిన తర్వాత, నాంపల్లి కోర్టు జైలు శిక్షకు బదులుగా సమాజ సేవ చేయాలని ఆదేశించింది. దీంతో మధురానగర్ పోలీసులు నిందితులను పార్కుకు తరలించి పార్క్‌లో చెత్తను సేకరించడం, మొక్కలకు నీళ్లు పోయడం, సందర్శకులకు క్రమశిక్షణ పాటించేందుకు సూచనలు చేయడం వంటి సేవలలో నిమగ్నం చేశారు.
ఈ చర్య ద్వారా నగరంలో శాంతి భద్రత కాపాడటమే కాకుండా, నిందితులకు తమ తప్పును గ్రహించే అవకాశమూ కల్పించిందని పోలీసులు తెలిపారు. ఈ వినూత్న పద్ధతికి స్థానికులు ప్రశంసలతో స్పందిస్తున్నారు.
పార్క్‌లో సమాజ సేవ చేస్తూ ప్రజల ముందు తాము చేసిన తప్పుకు ప్రాయశ్చిత్తం చేస్తున్నట్లు కొందరు నిందితులు చెప్పారు. యువతలో పెరుగుతున్న ఆకస్మిక గొడవలు, అసాంఘిక కార్యకలాపాల నియంత్రణలో ఇలాంటి కౌన్సెలింగ్ తరహా శిక్షా విధానాలు మరింత ప్రయోజనకరమని పోలీసులు అభిప్రాయపడ్డారు.