‘ధురంధర్’ సినిమాతో బాక్సాఫీస్ వద్ద భారీ విజయాన్ని అందుకున్న బాలీవుడ్ స్టార్ రణ్‌వీర్ సింగ్ మరో ఆసక్తికరమైన ప్రాజెక్ట్‌తో ప్రేక్షకుల ముందుకు రానున్నట్లు ప్రచారం జరుగుతోంది. ‘ధురంధర్’ దర్శకుడు ఆదిత్య ధర్‌తో ఆయన మరోసారి కలిసి పనిచేయబోతున్నారనే వార్తలు ప్రస్తుతం బాలీవుడ్‌లో చర్చనీయాంశంగా మారాయి. ఈసారి వీరిద్దరి కలయికలో చారిత్రక నేపథ్యంతో కూడిన చంద్రగుప్త మౌర్య బయోపిక్ తెరకెక్కనున్నట్లు సినీ వర్గాల్లో టాక్ వినిపిస్తోంది.

అశ్వత్థామ ప్రాజెక్ట్‌పై కొనసాగుతున్న సస్పెన్స్

ఆదిత్య ధర్ తదుపరి సినిమా విషయంలో చాలాకాలంగా అనేక ఊహాగానాలు వినిపిస్తున్నాయి. గతంలో విక్కీ కౌశల్‌తో ప్రకటించిన ‘ది ఇమ్మోర్టల్ అశ్వత్థామ’ కథను అల్లు అర్జున్‌కు వినిపించినట్లు వార్తలు వచ్చాయి. ఆ ప్రాజెక్ట్ ముందుకు వెళ్లకపోవడంతో ఎన్టీఆర్, ప్రభాస్‌లకు కూడా కథలు చెప్పినట్లు ప్రచారం జరిగింది. మరోవైపు ఈ చిత్రాన్ని తిరిగి విక్కీ కౌశల్‌తోనే తెరకెక్కించనున్నారనే వార్తలు కూడా తెరపైకి వచ్చాయి. అయితే వీటిలో దేనిపైనా ఇప్పటివరకు అధికారిక ప్రకటన వెలువడలేదు.

డ్రీమ్ ప్రాజెక్ట్‌గా చంద్రగుప్త మౌర్య బయోపిక్?

తాజా సమాచారం ప్రకారం.. ఆదిత్య ధర్ తన తదుపరి చిత్రంగా చంద్రగుప్త మౌర్య జీవిత కథను తెరకెక్కించాలని భావిస్తున్నారట. గతంలో అనుకున్న అశ్వత్థామ, ఆర్య వర్త్ కథలను పక్కన పెట్టి ఈ చారిత్రక కథాంశంపై దృష్టి సారించినట్లు తెలుస్తోంది. ప్రస్తుతం స్క్రిప్ట్ పనులు జరుగుతున్నాయని, ఈ ప్రాజెక్ట్‌ను తన డ్రీమ్ ప్రాజెక్ట్‌గా భావిస్తున్నారని బాలీవుడ్ వర్గాల్లో ప్రచారం జరుగుతోంది.

ఈ సినిమాలో ప్రధాన పాత్ర కోసం రణ్‌వీర్ సింగ్‌ను సంప్రదించినట్లు సమాచారం. అన్నీ అనుకున్నట్లు జరిగితే 2027లో చిత్రీకరణ ప్రారంభించి, 2028 చివరి నాటికి సినిమాను ప్రేక్షకుల ముందుకు తీసుకురావాలని ఆదిత్య ధర్ ప్రణాళికలు సిద్ధం చేస్తున్నట్లు టాక్.

‘ధురంధర్’ కాంబో రిపీట్ అయితే అంచనాలు భారీగానే!

రణ్‌వీర్ సింగ్, ఆదిత్య ధర్ కాంబినేషన్‌లో వచ్చిన ‘ధురంధర్’ అనూహ్య విజయాన్ని అందుకోవడంతో ఈ జోడీకి ప్రత్యేక గుర్తింపు లభించింది. ఈ సినిమా ప్రపంచవ్యాప్తంగా రూ.1,300 కోట్లకు పైగా వసూళ్లు సాధించినట్లు ట్రేడ్ వర్గాలు పేర్కొన్నాయి. ఇక సీక్వెల్ ‘ధురంధర్: ది రివెంజ్’ కూడా సుమారు రూ.1,800 కోట్ల వసూళ్లతో సంచలనం సృష్టించి, భారతీయ చిత్రాల్లో అత్యధిక వసూళ్లు సాధించిన సినిమాల జాబితాలో రెండో స్థానానికి చేరినట్లు సమాచారం.

ఈ నేపథ్యంలో రణ్‌వీర్, ఆదిత్య ధర్ మరోసారి చేతులు కలిపితే ఆ సినిమాపై భారీ అంచనాలు ఏర్పడటం ఖాయం. అయితే చంద్రగుప్త మౌర్య బయోపిక్ కోసమే వీరిద్దరూ మళ్లీ కలిసి పనిచేయబోతున్నారా? ఈ వార్తల్లో ఎంతవరకు నిజం ఉంది? అన్నది తెలియాలంటే చిత్రబృందం నుంచి అధికారిక ప్రకటన వచ్చే వరకు వేచి చూడాల్సిందే.

Leave a Reply

Your email address will not be published. Required fields are marked *