DNews: 27 Oct: ఇటీవలి కాలంలో ప్రజలు తమ డిమాండ్లు నెరవేర్చించుకునేందుకు సెల్‌ఫోన్ టవర్‌లు, విద్యుత్ టవర్‌లపై ఎక్కే ఘటనలు పెరుగుతున్నాయి. అటువంటి మరో ఘటన హైదరాబాద్‌ సమీపంలోని అబ్దుల్లాపుర్‌మెట్‌లో చోటుచేసుకుంది. పెళ్లి కావాలన్న డిమాండ్‌తో ఓ వ్యక్తి విద్యుత్ టవర్‌పై ఎక్కి హంగామా చేశాడు.
స్థానికులు గమనించి విద్యుత్ శాఖ సిబ్బందికి, పోలీసులకు సమాచారం అందించారు. వెంటనే అధికారులు క్రేన్, అంబులెన్స్‌తో అక్కడకు చేరుకుని అతన్ని సురక్షితంగా కిందకు దించేందుకు ప్రయత్నించారు. అయితే అధికారులు అతన్ని కిందకు దించేందుకు ప్రయత్నిస్తున్న సమయంలో ఆ వ్యక్తి అకస్మాత్తుగా టవర్‌పై నుంచి దూకాడు. ఈ దృశ్యం చూసిన వారంతా షాక్‌కు గురయ్యారు.
అదృష్టవశాత్తు, అతను పడిన ప్రదేశంలో మట్టి ఉండటంతో ప్రాణాపాయం లేకుండా స్వల్ప గాయాలతో బయటపడ్డాడు. అనంతరం అక్కడి రెస్క్యూ సిబ్బంది 108 అంబులెన్స్ సహాయంతో అతన్ని స్థానిక ప్రభుత్వ ఆసుపత్రికి తరలించారు. అయితే ఈ సంఘటనను అక్కడున్న కొందరు మొబైల్ ఫోన్లలో వీడియో తీసి సోషల్ మీడియాలో పోస్ట్ చేయడంతో అది వైరల్‌గా మారింది.
ఇటీవలి కాలంలో ఇలాంటి సంఘటనలు పెరుగుతున్న నేపథ్యంలో అధికారులు ప్రజలను హెచ్చరిస్తూ, తమ సమస్యలను ఈ విధంగా కాకుండా చట్టబద్ధమైన మార్గాల్లో పరిష్కరించుకోవాలని సూచిస్తున్నారు.