DNews:10 OCT:హైదరాబాద్, అక్టోబర్ 10 : హైదరాబాద్లోని లాలాగూడ పోలీస్స్టేషన్ పరిధిలో ఓ డిగ్రీ విద్యార్థిని ఆత్మహత్యకు పాల్పడిన విషాద ఘటన చోటుచేసుకుంది. వాలీబాల్ కోచ్ అంబాజీ అనే వ్యక్తి వేధింపులు భరించలేక మౌలిక (19) అనే యువతి ఆత్మహత్య చేసుకుంది.
వివరాల్లోకి వెళ్తే—తార్నాక ప్రాంతంలోని రైల్వే డిగ్రీ కళాశాలలో మౌలిక డిగ్రీ రెండో సంవత్సరం చదువుతోంది. అదే కళాశాలలో వాలీబాల్ కోచ్గా పనిచేస్తున్న అంబాజీ కొంతకాలంగా మౌలికను ప్రేమించమని ఒత్తిడి చేస్తూ, తరచుగా వేధిస్తున్నట్లు సమాచారం. ఈ వేధింపులతో మౌలిక తీవ్ర మనస్తాపానికి గురైంది.
బుధవారం రాత్రి సాయిబాబా దేవాలయం సమీపంలోని తన ఇంట్లో ఎవరూ లేని సమయంలో ఉరివేసుకుని ఆత్మహత్య చేసుకుంది. కుటుంబ సభ్యులు గమనించి స్థానికులకు, పోలీసులకు సమాచారం అందించారు. పోలీసులు సంఘటనా స్థలానికి చేరుకుని మృతదేహాన్ని పోస్టుమార్టం కోసం గాంధీ ఆసుపత్రికి తరలించారు.
మృతురాలి తండ్రి ప్రమోద్ కుమార్ ఇచ్చిన ఫిర్యాదు మేరకు పోలీసులు వాలీబాల్ కోచ్ అంబాజీపై అబెట్ట్మెంట్ టు స్యూసైడ్ (ఆత్మహత్యకు ప్రేరేపించడం) కింద కేసు నమోదు చేశారు. నిందితుడి కోసం గాలింపు చర్యలు కొనసాగుతున్నాయని పోలీసులు తెలిపారు.
ఈ ఘటనతో కళాశాల విద్యార్థులు, స్థానికులు తీవ్ర ఆవేదన వ్యక్తం చేస్తున్నారు. విద్యాసంస్థల్లో మహిళల భద్రతపై అధికారులు మరింత కఠిన చర్యలు తీసుకోవాలని ప్రజలు డిమాండ్ చేస్తున్నారు.