DSports:Sep19:భారత స్టార్ షట్లర్ పీవీ సింధు, చైనా మాస్టర్స్ వరల్డ్ టూర్ సూపర్ 750 టోర్నమెంట్లో అద్భుత ప్రదర్శనతో క్వార్టర్ ఫైనల్స్లోకి ప్రవేశించింది. రెండో రౌండ్ మ్యాచ్లో థాయ్లాండ్కు చెందిన పొర్న్పావీ చోచువోంగ్ను ఓడించి, ఈ ఏడాది తొలి టైటిల్ కోసం పోరాటాన్ని కొనసాగించింది.
చైనాలోని షెన్జెన్లో జరుగుతున్న చైనా మాస్టర్స్ టోర్నమెంట్లో పీవీ సింధు మరోసారి తన సత్తా చాటింది. గురువారం జరిగిన మహిళల సింగిల్స్ ప్రిక్వార్టర్స్లో ప్రపంచ 14వ ర్యాంకర్ సింధు, ఆరో సీడ్ పొర్న్పావీ చోచువోంగ్పై 21-15, 21-15 తేడాతో స్ట్రెయిట్ గేమ్స్లో విజయం సాధించింది. ఈ మ్యాచ్ కేవలం 41 నిమిషాల్లోనే ముగిసింది.
ఈ విజయంతో, సింధు థాయ్ షట్లర్పై తన హెడ్-టు-హెడ్ రికార్డ్ను 6-5కు మెరుగుపరుచుకుంది. గత కొంతకాలంగా ఫామ్ లేమితో సతమతమైన సింధు, ఈ విజయంపై సంతోషం వ్యక్తం చేసింది. మ్యాచ్ ప్రారంభం నుంచే అప్రమత్తంగా ఉండి, తన వంద శాతం ప్రదర్శన ఇచ్చానని పేర్కొంది. చోచువోంగ్ టాప్ ప్లేయర్ అని, ఆమెతో గతంలో జరిగిన మ్యాచ్లు కూడా కఠినంగా ఉన్నాయని సింధు గుర్తు చేసుకుంది. తొలి గేమ్ గెలిచాక, రెండో గేమ్లో మరింత అప్రమత్తంగా ఆడానని చెప్పింది.
క్వార్టర్ ఫైనల్స్లో సింధుకు కఠిన సవాలు ఎదురుకానుంది. ఆమె ప్రపంచ నంబర్ వన్, టాప్ సీడ్ ఆన్ సే యంగ్ (దక్షిణ కొరియా)తో తలపడనుంది. ఆన్ సే యంగ్తో ఇప్పటివరకు సింధు ఏడుసార్లు తలపడి, ఒక్కసారి కూడా విజయం సాధించలేకపోయింది. ఈ నేపథ్యంలో, సింధు ఆన్ సే యంగ్ను ఓడించి సెమీఫైనల్స్కు చేరుకుంటుందో లేదో చూడాలి.
మరోవైపు, పురుషుల డబుల్స్ విభాగంలో భారత జోడీ సాత్విక్ సాయిరాజ్-చిరాగ్ శెట్టి కూడా క్వార్టర్ ఫైనల్స్లోకి అడుగుపెట్టారు. వారు ప్రిక్వార్టర్ ఫైనల్స్లో చైనీస్ తైపీకి చెందిన సియాంగ్ చియె చియు-వాంగ్ చి లిన్ జంటను ఓడించారు.