భారత సీనియర్ లెగ్ స్పిన్నర్ కర్ణ శర్మ ప్రొఫెషనల్ క్రికెట్కు రిటైర్మెంట్ ప్రకటించాడు. 38 ఏళ్ల కర్ణ శర్మ అంతర్జాతీయ, దేశవాళీ క్రికెట్లోని అన్ని ఫార్మాట్లకు వీడ్కోలు పలికాడు. ప్రస్తుతం యూపీ టీ20 లీగ్లో కాన్పూర్ సూపర్ స్టార్స్ తరఫున ఆడుతున్న ఆయన.. ఆగస్టు 25న మీరట్ మావెరిక్స్తో జరిగే మ్యాచ్నే తన చివరి ప్రొఫెషనల్ మ్యాచ్గా వెల్లడించాడు.
రిటైర్మెంట్ సందర్భంగా తన క్రికెట్ ప్రయాణంలో అండగా నిలిచిన కుటుంబ సభ్యులు, బీసీసీఐ, రైల్వేస్, క్రికెట్ సంఘాలు, కోచ్లు, సహచరులు, అభిమానులకు కర్ణ శర్మ కృతజ్ఞతలు తెలిపాడు. ఇకపై కోచింగ్తో పాటు క్రికెట్కు సంబంధించిన ఇతర బాధ్యతల్లో కొనసాగుతానని చెప్పాడు.
2014లో అంతర్జాతీయ క్రికెట్లోకి అడుగుపెట్టిన కర్ణ శర్మ.. భారత్ తరఫున ఒక టెస్టు, రెండు వన్డేలు, ఒక టీ20 మ్యాచ్ ఆడాడు. అంతర్జాతీయ కెరీర్ ఎక్కువ కాలం సాగకపోయినా.. దేశవాళీ, ఐపీఎల్లో మాత్రం తనకంటూ ప్రత్యేక గుర్తింపు తెచ్చుకున్నాడు.
ఐపీఎల్లో సన్రైజర్స్ హైదరాబాద్, ముంబై ఇండియన్స్, చెన్నై సూపర్ కింగ్స్, ఆర్సీబీ జట్లకు ప్రాతినిధ్యం వహించిన కర్ణ శర్మ నాలుగు టైటిళ్లు గెలిచాడు. 90 ఐపీఎల్ మ్యాచ్ల్లో 83 వికెట్లు సాధించాడు. మూడు వేర్వేరు జట్లతో వరుసగా మూడు సీజన్లలో టైటిళ్లు గెలిచిన తొలి ఆటగాడిగా కూడా రికార్డు సృష్టించాడు.
ఫస్ట్ క్లాస్ క్రికెట్లో 97 మ్యాచ్లు ఆడి 270 వికెట్లు, లిస్ట్-ఎలో 123 మ్యాచ్ల్లో 153 వికెట్లు, టీ20 క్రికెట్లో 191 మ్యాచ్ల్లో 168 వికెట్లు పడగొట్టాడు.
దాదాపు రెండు దశాబ్దాల పాటు క్రికెట్లో కొనసాగిన కర్ణ శర్మ.. నాలుగు ఐపీఎల్ టైటిళ్లు, వందలాది వికెట్లతో తనకంటూ ప్రత్యేక ముద్ర వేసుకున్నాడు. ఆగస్టు 25న జరిగే మ్యాచ్తో అతడి ప్రొఫెషనల్ క్రికెట్ ప్రయాణానికి తెరపడనుంది.