దులీప్ ట్రోఫీ 2026 ఫైనల్లో ఈస్ట్ జోన్ కెప్టెన్ ఇషాన్ కిషన్ తన బ్యాట్తో విధ్వంసం సృష్టించాడు. చెన్నైలోని ఎంఏ చిదంబరం స్టేడియంలో సౌత్ జోన్తో జరుగుతున్న టైటిల్ పోరులో రెండో రోజు అద్భుతమైన బ్యాటింగ్తో డబుల్ సెంచరీ పూర్తి చేసి అరుదైన రికార్డును తన ఖాతాలో వేసుకున్నాడు. తొలి రోజు 111 పరుగులతో నాటౌట్గా నిలిచిన ఇషాన్.. రెండో రోజు కూడా అదే దూకుడును కొనసాగించాడు.
సౌత్ జోన్ బౌలర్లపై మొదటి నుంచే ఎదురుదాడికి దిగిన ఇషాన్ 270 బంతుల్లో డబుల్ సెంచరీ మార్కును అందుకున్నాడు. అతడి ఇన్నింగ్స్లో 26 ఫోర్లు, 2 సిక్సర్లు ఉన్నాయి. కెప్టెన్గా ముందుండి జట్టును నడిపించిన ఇషాన్ భారీ ఇన్నింగ్స్తో ఈస్ట్ జోన్ను మరింత బలమైన స్థితిలోకి తీసుకెళ్లాడు.
ఈ డబుల్ సెంచరీతో దులీప్ ట్రోఫీ ఫైనల్ చరిత్రలో 200 లేదా అంతకంటే ఎక్కువ పరుగులు చేసిన ఐదో బ్యాటర్గా ఇషాన్ కిషన్ నిలిచాడు. అంతేకాదు, ఈ ఘనత సాధించిన అరుదైన కెప్టెన్ల జాబితాలోనూ తన పేరును నమోదు చేసుకున్నాడు. ఇషాన్కు ముందు రామన్ లాంబా, అన్షుమన్ గైక్వాడ్, చెతేశ్వర్ పుజారా, యశస్వి జైస్వాల్ దులీప్ ట్రోఫీ ఫైనల్లో డబుల్ సెంచరీలు సాధించారు.
మ్యాచ్ తొలి రోజే ఇషాన్ తన బ్యాటింగ్ జోరును చూపించాడు. ఈస్ట్ జోన్ 385/4తో తొలి రోజు ఆటను ముగించగా, ఇషాన్ 111 పరుగులతో నాటౌట్గా ఉన్నాడు. అతడికి కుమార్ కుశాగ్ర మంచి సహకారం అందించాడు. వీరిద్దరి భాగస్వామ్యం ఈస్ట్ జోన్కు భారీ స్కోర్కు బలమైన పునాది వేసింది.
రెండో రోజు ఇషాన్ మరింత దూకుడుగా ఆడుతూ డబుల్ సెంచరీ సాధించడంతో ఈస్ట్ జోన్ భారీ స్కోర్ దిశగా దూసుకెళ్లింది. కీలకమైన ఫైనల్ మ్యాచ్లో కెప్టెన్ ఇంతటి అద్భుతమైన ఇన్నింగ్స్ ఆడటంతో ఈస్ట్ జోన్ టైటిల్పై మరింత పట్టు సాధించింది. ఇషాన్ కిషన్ బ్యాటింగ్ ప్రస్తుతం ఈ మ్యాచ్కు ప్రధాన హైలైట్గా నిలిచింది.