DNews:24 OCT:హైదరాబాద్: జూబ్లీహిల్స్లోని ఒక ప్రముఖ కేఫ్, స్థానికులకు ‘చిల్ అయ్యే ప్లేస్’గా పేరుగాంచిన ‘హార్ట్ కప్ కేఫ్’ అగ్ని ప్రమాదంలో పూర్తిగా కాలి బూడిదయ్యింది. 2025, అక్టోబర్ 24వ తేదీ ఉదయం ఈ భారీ అగ్ని ప్రమాదం సంభవించింది.
జూబ్లీహిల్స్ రోడ్ నెంబర్ 45లోని పెద్దమ్మ గుడి సమీపంలో ఉన్న ఈ కేఫ్ ఎంతగానో ప్రాచుర్యం పొందింది, దీని పేరు మీదుగానే ఆ ప్రాంతానికి ‘హార్ట్ కప్ కేఫ్ జంక్షన్’ అని కూడా పేరు వచ్చింది. అక్టోబర్ 24వ తేదీ ఉదయం అకస్మాత్తుగా కేఫ్లో మంటలు చెలరేగాయి.
ప్రమాదం జరిగిన సమయంలో కేఫ్ మూసివేసి ఉంది. కొన్నాళ్లుగా కేఫ్ను తెరవకపోవడంతో, ప్రమాదం జరిగినప్పుడు లోపల ఎవరూ లేరు. ఈ కారణంగా ఎలాంటి ప్రాణ నష్టం జరగలేదని అగ్నిమాపక సిబ్బంది ధృవీకరించారు. కేఫ్ మూసివేసి ఉండటం వల్ల పెద్ద ప్రమాదం తప్పినట్లు భావిస్తున్నారు.
ఈ అగ్ని ప్రమాదం కారణంగా కేఫ్లోని ఫర్నిచర్, డెకరేషన్ సామాగ్రి, కుర్చీలు, టేబుల్స్ సహా ఇతర వస్తువులు పూర్తిగా కాలిపోయాయి. సమాచారం అందిన వెంటనే ఘటనా స్థలానికి చేరుకున్న అగ్నిమాపక సిబ్బంది, మంటలు చుట్టుపక్కల ప్రాంతాలకు వ్యాపించకుండా వెంటనే అదుపులోకి తీసుకున్నారు. అగ్ని ప్రమాదానికి గల కారణాలు, మంటలు ఎలా వచ్చాయనే విషయాలపై ప్రస్తుతం విచారణ జరుగుతోంది.