D-News: ఇరాన్తో కొనసాగుతున్న యుద్ధంపై అమెరికా అధ్యక్షుడు డొనాల్డ్ ట్రంప్ కీలక వ్యాఖ్యలు చేశారు. యుద్ధం త్వరలోనే ముగిసే అవకాశం ఉందని ఆయన తెలిపారు. ఇరాన్ సుప్రీం లీడర్ అయతొల్లా మొజ్తబా ఖమేనీ తీవ్రంగా గాయపడ్డారని, అయితే ఇంకా బతికే ఉన్నారని ట్రంప్ పేర్కొన్నారు.
ఓ ఇంటర్వ్యూలో మాట్లాడిన ట్రంప్.. ఖమేనీ చనిపోయారని తాను అనుకోవడం లేదన్నారు. ఆయన శరీరంలోని ఎడమ వైపు, ముఖ్యంగా చేయి, కాలు తీవ్రంగా గాయపడినట్లు చెప్పారు. అయితే ఖమేనీ ఆరోగ్య పరిస్థితికి సంబంధించి ట్రంప్ ఎలాంటి ఆధారాలను వెల్లడించలేదు.
ఇరాన్ అధికారులు ఇప్పటికీ సుప్రీం లీడర్తో సంప్రదింపులు జరుపుతున్నారని ట్రంప్ తెలిపారు. కీలక నిర్ణయాలకు ఆయన అనుమతి తీసుకుంటున్నట్లు ఇరాన్ వర్గాలు చెబుతున్నాయని అన్నారు.
ఇరాన్ సైనిక శక్తికి భారీ నష్టం
అమెరికా సైనిక చర్యల కారణంగా ఇరాన్ గణనీయంగా బలహీనపడిందని ట్రంప్ అన్నారు. ఇరాన్ నౌకాదళం, వైమానిక దళం తీవ్రంగా దెబ్బతిన్నాయని పేర్కొన్నారు. కొంతమంది సైనికులకు జీతాలు కూడా అందడం లేదని, దేశంలో ద్రవ్యోల్బణం పెరిగిందని చెప్పారు.
అమెరికా బలగాలు ఒక్క రాత్రిలో 22 పడవలను ధ్వంసం చేసినట్లు కూడా ట్రంప్ వెల్లడించారు. అమెరికా నేవీ, సైన్యం సమర్థంగా పనిచేస్తున్నాయని ప్రశంసించారు.
హోర్ముజ్ జలసంధి పరిస్థితిపై..
ప్రపంచ చమురు రవాణాకు కీలకమైన హోర్ముజ్ జలసంధి పనిచేస్తూనే ఉందని ట్రంప్ చెప్పారు. అక్కడ ఉన్న మైన్లను తొలగించినట్లు తెలిపారు. జలసంధి ద్వారా పెద్ద మొత్తంలో చమురు రవాణా జరుగుతోందని పేర్కొన్నారు.
యుద్ధం కారణంగా ఇంధన ధరలపై ప్రభావం పడినప్పటికీ.. ప్రస్తుతం ధరలు వేగంగా తగ్గుతున్నాయని ట్రంప్ అన్నారు.
అణ్వాయుధం అడ్డుకోవడమే ప్రధాన లక్ష్యం
ఇరాన్ అణ్వాయుధాన్ని అభివృద్ధి చేసుకోకుండా అడ్డుకోవడమే అమెరికా సైనిక చర్యల ప్రధాన ఉద్దేశమని ట్రంప్ స్పష్టం చేశారు. ఇరాన్ అణ్వాయుధాన్ని కలిగి ఉండటాన్ని అమెరికా అనుమతించదని ఆయన అన్నారు.
ఇరాన్ ఇప్పటికే చాలా వరకు బలహీనపడిందని, పరిస్థితులు తమకు అనుకూలంగా మారుతున్నాయని ట్రంప్ అభిప్రాయపడ్డారు. యుద్ధంలో త్వరలోనే అమెరికాకు పెద్ద విజయం లభిస్తుందని ఆశాభావం వ్యక్తం చేశారు.
అదే సమయంలో, తన తొలి అధ్యక్ష పదవిలో అమెరికాను 2015 ఇరాన్ అణు ఒప్పందం (JCPOA) నుంచి తప్పించిన నిర్ణయాన్ని కూడా ట్రంప్ సమర్థించారు.