D News: శాసనసభలో మాజీ మంత్రి హరీష్ రావు స్పీకర్‌ను బెదిరించే ధోరణిలో మాట్లాడుతున్నారని మంత్రి దుద్దిళ్ల శ్రీధర్ బాబు ఆరోపించారు. స్పీకర్ వ్యవస్థను అవమానించేలా వ్యవహరించడం ప్రజాస్వామ్యానికి మంచిది కాదని ఆయన తీవ్రంగా వ్యాఖ్యానించారు.
హరీష్ రావు తీరుపై శ్రీధర్ బాబు ఆగ్రహం
సభను ఎలా నడపాలనే విషయంలో స్పీకర్‌కు ప్రతిపక్ష నేతలు ఆదేశాలు ఇవ్వడం సరికాదని శ్రీధర్ బాబు అన్నారు. “ఇలా చేయొద్దు.. అలా చేయొద్దు” అంటూ స్పీకర్‌ను నిర్దేశించే హక్కు ఎవరికుందని ప్రశ్నించారు.
స్పీకర్‌పై వ్యాఖ్యలు వీడియోల్లో రికార్డ్
స్పీకర్‌పై అనుచిత వ్యాఖ్యలు చేశారన్న వ్యవహారంలో ఏం జరిగిందో వీడియోల్లో స్పష్టంగా నమోదైందని మంత్రి తెలిపారు. ఈ అంశంపై ఊహాగానాలకు తావులేదని అన్నారు.
మహిళా ఎమ్మెల్యేల ఘటనపై విచారణ
మహిళా ప్రజాప్రతినిధులపై జరిగిన ఘటనలను ప్రభుత్వం పట్టించుకోవడం లేదన్న విమర్శలను శ్రీధర్ బాబు ఖండించారు. మహిళా ఎమ్మెల్యేల ఘటనపై పూర్తి నివేదిక సమర్పించాలని స్పీకర్ ఇప్పటికే ఆదేశించారని తెలిపారు.
స్పీకర్ వ్యవస్థపై దాడి సరికాదన్న మంత్రి
మహిళా ఎమ్మెల్యేల ఘటనను ప్రస్తావిస్తూ స్పీకర్‌పై జరిగిన వ్యాఖ్యలను పట్టించుకోవద్దని కోరడం ప్రతిపక్ష ద్వంద్వ వైఖరికి నిదర్శనమని శ్రీధర్ బాబు విమర్శించారు. స్పీకర్ వ్యవస్థపై దాడి జరిగిన అంశాన్ని పక్కన పెట్టడం సమంజసం కాదని అన్నారు.
నిబంధనల ప్రకారం చర్యలు
చట్టసభ నిబంధనల ప్రకారం స్పీకర్‌పై అనుచిత వ్యాఖ్యల వ్యవహారంలో చర్యలు తప్పవని శ్రీధర్ బాబు స్పష్టం చేశారు. సభ గౌరవాన్ని కాపాడాల్సిన బాధ్యత ప్రతి సభ్యుడిపై ఉందని పేర్కొన్నారు.