D News: Jul 18: ఏపీ, తెలంగాణలో మూడు రోజుల పాటు వర్షాల హెచ్చరిక.. మత్స్యకారులు సముద్రంలోకి వెళ్లొద్దని సూచన
తెలుగు రాష్ట్రాల్లో వాతావరణం ఒక్కసారిగా చల్లబడింది. ఉత్తర ఒడిశా, జార్ఖండ్, పశ్చిమ బెంగాల్ పరిసర ప్రాంతాల్లో ఏర్పడిన అల్పపీడనం ప్రస్తుతం పశ్చిమ బెంగాల్ పరిసరాల్లో కొనసాగుతున్నట్లు భారత వాతావరణ శాఖ తెలిపింది. దీనికి అనుబంధంగా సముద్ర మట్టానికి సుమారు 5.8 కిలోమీటర్ల ఎత్తు వరకు ఉపరితల ఆవర్తనం విస్తరించి ఉన్నట్లు వెల్లడించింది.
వాతావరణ శాఖ అంచనాల ప్రకారం రాబోయే 24 గంటల్లో అల్పపీడనం క్రమంగా బలహీనపడే అవకాశం ఉంది. అయితే సముద్ర మట్టం వద్ద ఏర్పడిన రుతుపవన ద్రోణి ఈశాన్య బంగాళాఖాతం వైపు విస్తరించి ఉండటంతో తెలంగాణ, ఆంధ్రప్రదేశ్ రాష్ట్రాల్లో మరో మూడు రోజుల పాటు విస్తారంగా వర్షాలు కురిసే అవకాశం ఉందని అధికారులు హెచ్చరించారు.
తెలంగాణలో మూడు రోజుల పాటు వర్షాలు
హైదరాబాద్ వాతావరణ కేంద్రం అంచనా ప్రకారం తెలంగాణలో రానున్న మూడు రోజుల పాటు తేలికపాటి నుంచి మోస్తరు వర్షాలు కురిసే అవకాశం ఉంది. రాష్ట్రంలోని పలు ప్రాంతాల్లో ఉరుములు, మెరుపులతో కూడిన వర్షాలు కురిసే అవకాశముందని అధికారులు తెలిపారు.
వర్షాలతో పాటు గంటకు 50 నుంచి 60 కిలోమీటర్ల వేగంతో ఈదురు గాలులు వీచే అవకాశం ఉందని వాతావరణ శాఖ పేర్కొంది. ముఖ్యంగా శని, ఆదివారాల్లో రాష్ట్రవ్యాప్తంగా తేలికపాటి నుంచి మోస్తరు వర్షాలు కురిసే అవకాశముండగా, గంటకు 30 నుంచి 40 కిలోమీటర్ల వేగంతో బలమైన ఉపరితల గాలులు వీచే అవకాశం ఉందని స్పష్టం చేసింది.
ఏపీ మత్స్యకారులకు విపత్తుల నిర్వహణ సంస్థ హెచ్చరిక
అల్పపీడన ప్రభావంతో సముద్రం అల్లకల్లోలంగా మారే అవకాశముందని ఏపీ విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ తెలిపారు. తీర ప్రాంతాల్లో అలల ఉధృతి పెరుగుతున్నందున మత్స్యకారులు సముద్రంలో చేపల వేటకు వెళ్లవద్దని సూచించారు.
కోస్తాంధ్ర తీరం వెంబడి గంటకు 40 నుంచి 50 కిలోమీటర్ల వేగంతో ఈదురు గాలులు వీచే అవకాశం ఉందని ఆయన వెల్లడించారు. పరిస్థితులను దృష్టిలో ఉంచుకుని మత్స్యకారులు అప్రమత్తంగా ఉండాలని సూచించారు.
ఏపీ జిల్లాల్లో వర్షాల అంచనా
శనివారం విజయనగరం, పార్వతీపురం మన్యం, అల్లూరి సీతారామరాజు, కోనసీమ, తూర్పు గోదావరి, పశ్చిమ గోదావరి, ఏలూరు, కృష్ణా, ఎన్టీఆర్, గుంటూరు జిల్లాల్లో అక్కడక్కడ మోస్తరు వర్షాలు కురిసే అవకాశం ఉందని అధికారులు తెలిపారు. మిగిలిన జిల్లాల్లో కొన్ని ప్రాంతాల్లో తేలికపాటి జల్లులు పడే అవకాశముందని పేర్కొన్నారు.
ప్రజలకు వాతావరణ శాఖ సూచనలు
ఉరుములు, మెరుపులతో కూడిన వర్షాలు కురిసే సమయంలో ప్రజలు అప్రమత్తంగా ఉండాలని వాతావరణ శాఖ సూచించింది. వర్షం పడుతున్న సమయంలో ప్రయాణాల్లో ఉంటే చెట్ల కింద లేదా భారీ హోర్డింగ్స్, ఫ్లెక్సీల కింద ఆశ్రయం పొందవద్దని హెచ్చరించింది.
ఈదురు గాలుల కారణంగా విద్యుత్ స్తంభాలు వంగడం లేదా విద్యుత్ తీగలు తెగిపడిన సందర్భాల్లో వాటికి దూరంగా ఉండి వెంటనే విద్యుత్ శాఖ అధికారులకు సమాచారం అందించాలని సూచించింది.
అలాగే లోతట్టు ప్రాంతాల్లో నివసించే ప్రజలు, దూర ప్రయాణాలు చేసే వారు ఎప్పటికప్పుడు వాతావరణ శాఖ జారీ చేసే హెచ్చరికలను గమనిస్తూ అవసరమైన జాగ్రత్తలు తీసుకోవాలని అధికారులు విజ్ఞప్తి చేశారు.