నన్ను నమ్మేవాళ్ల కోసం కష్టపడుతూనే ఉంటా.. ‘ది ప్యారడైజ్’పై నాని ఎమోషనల్ కామెంట్స్!

D News: నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్‌లో తెరకెక్కిన పాన్ ఇండియా పీరియడ్ యాక్షన్ డ్రామా ‘ది ప్యారడైజ్’పై భారీ అంచనాలు ఉన్నాయి. కయాదు లోహర్ కథానాయికగా నటించిన ఈ సినిమాలో మోహన్‌బాబు, రాఘవ్ జుయల్, సోనాలి కులకర్ణి, సంపూర్ణేష్ బాబు తదితరులు కీలక పాత్రలు పోషించారు. ఎస్‌ఎల్‌వీ సినిమాస్‌పై సుధాకర్ చెరుకూరి నిర్మించిన ఈ సినిమా సెప్టెంబర్ 24న ప్రేక్షకుల ముందుకు రానుంది. ఈ సందర్భంగా హైదరాబాద్‌లో నిర్వహించిన ప్రీ-రిలీజ్ వేడుకలో నాని ఆసక్తికర వ్యాఖ్యలు చేశారు.

‘ఇది మా సినిమా అనుకుని పనిచేశారు’

‘ది ప్యారడైజ్’ కోసం ప్రతి ఒక్కరూ ఎంతో అంకితభావంతో పనిచేశారని నాని అన్నారు. దర్శకుడు శ్రీకాంత్ ఓదెలతో తనకు అన్నదమ్ముల అనుబంధం ఉందని చెప్పారు. సినిమా కోసం పనిచేసిన ప్రతి ఒక్కరూ దీన్ని తమ సొంత సినిమాగా భావించి కష్టపడ్డారని తెలిపారు.

తెరపై ప్రేక్షకులు చూస్తున్న దానికంటే సినిమాలో ఇంకా చాలా ఎక్కువ ఉందని నాని చెప్పారు. సంపూర్ణేష్ బాబు పాత్ర ఎవరూ ఊహించని విధంగా ఉంటుందని, రాఘవ్ జుయల్ మంచి ప్రతిభ ఉన్న నటుడని ప్రశంసించారు. సోనాలి కులకర్ణి పోషించిన సమ్మక్క పాత్రను కూడా ప్రేక్షకులు మర్చిపోలేరని అన్నారు.

కయాదు లోహర్ పాత్రను అందరూ ప్రేమిస్తారని చెప్పిన నాని.. మోహన్‌బాబు గురించి ప్రత్యేకంగా ప్రస్తావించారు. ఆయన నటన, స్క్రీన్ ప్రెజెన్స్, గొంతు వంటి ప్రత్యేకతలను ఇప్పటి తరం ‘ది ప్యారడైజ్’ ద్వారా చూస్తుందని పేర్కొన్నారు. ఆయనతో కలిసి పనిచేయడం అద్భుతమైన అనుభూతి అని చెప్పారు.

‘నన్ను నమ్మేవాళ్ల కోసం కష్టపడతా’

తనపై అభిమానులు చూపిస్తున్న ప్రేమ గురించి నాని భావోద్వేగంగా మాట్లాడారు. అభిమానులు తనకు వందేళ్లకు సరిపడా ప్రేమను ఇప్పటికే ఇచ్చారని అన్నారు.

‘‘మనం ఎదుగుతుంటే మన చుట్టూ పాజిటివిటీతో పాటు నెగెటివిటీ కూడా పెరుగుతుంది. నెగెటివిటీని పట్టించుకోవద్దు. మనం గెలవాలని కోరుకునేవాళ్లు పెరిగినట్టే.. మనం ఓడిపోతే చూద్దామని అనుకునేవాళ్లు కూడా పెరుగుతారు. కానీ వాళ్లను ఓడించడానికి నేను ప్రయత్నించడం లేదు. నేను గెలుస్తానని నమ్మేవాళ్లను గెలిపించడానికి నిరంతరం కష్టపడుతూనే ఉంటా’’ అని నాని అన్నారు.

సెప్టెంబర్ 23 రాత్రి నుంచే సంబరాలు మొదలవుతాయని, ‘ది ప్యారడైజ్’ థియేటర్లలో సందడి చేయబోతోందని ఆయన పేర్కొన్నారు. టికెట్ ధరల పెంపునకు అనుమతి ఇచ్చిన ఆంధ్రప్రదేశ్, తెలంగాణ ప్రభుత్వాలకు కూడా నాని ధన్యవాదాలు తెలిపారు.

ప్రీ-రిలీజ్ వేడుకలో కయాదు లోహర్, సోనాలి కులకర్ణి, రాఘవ్ జుయల్, నిర్మాత సుధాకర్ చెరుకూరి, దిల్ రాజు, మైత్రీ రవి, నవీన్ యెర్నేని, సంపూర్ణేష్ బాబు, గేయ రచయిత కాసర్ల శ్యామ్, ఫైట్ మాస్టర్స్ రామ్-లక్ష్మణ్ తదితరులు పాల్గొన్నారు. సంగీత దర్శకుడు అనిరుధ్ రవిచందర్ ప్రత్యేక వీడియో సందేశం ద్వారా మాట్లాడారు.