D News: Jul 17: విజయవాడ/హైదరాబాద్: విదేశాల్లో ఉద్యోగాలు ఇప్పిస్తామంటూ నిరుద్యోగులను నమ్మించి కోట్లాది రూపాయలు వసూలు చేసిన “ఫ్లయింగ్ బోర్డర్స్” ఏజెన్సీ వ్యవహారం తెలుగు రాష్ట్రాల్లో సంచలనం రేపుతోంది. విజయవాడ, హైదరాబాద్లలో శాఖలు ఏర్పాటు చేసిన ఈ సంస్థ నిర్వాహకురాలు సౌజన్య, విదేశీ ఉద్యోగాల ఆశ చూపిస్తూ యువతను మోసం చేసినట్లు ఆరోపణలు ఉన్నాయి. ప్రస్తుతం ఆమె పోలీసుల విచారణకు హాజరుకాకుండా తప్పించుకు తిరుగుతుండగా, అదుపులోకి తీసుకునేందుకు పోలీసులు చర్యలు చేపట్టారు.
యూరప్ దేశాల్లో ఉద్యోగాలు కల్పిస్తామని చెబుతూ స్కిల్డ్ అభ్యర్థుల నుంచి రూ.11 నుంచి రూ.13 లక్షలు, సెమీ స్కిల్డ్ అభ్యర్థుల నుంచి రూ.10 నుంచి రూ.12 లక్షలు, అన్స్కిల్డ్ అభ్యర్థుల నుంచి రూ.8 నుంచి రూ.10 లక్షల వరకు వసూలు చేసినట్లు దర్యాప్తులో వెల్లడైంది. అభ్యర్థుల్లో నమ్మకం కలిగించేందుకు సంస్థ సిబ్బందే నకిలీ వాయిస్ ఇంటర్వ్యూలు నిర్వహించడం, వీడియో కాల్ల పేరుతో ముఖం కనిపించని మాక్ ఇంటర్వ్యూలు ఏర్పాటు చేయడం వంటి పద్ధతులు అనుసరించినట్లు ఆరోపణలు ఉన్నాయి.
ఈ మోసపూరిత హామీలను నమ్మిన అనేక మంది నిరుద్యోగ యువకులు అప్పులు చేసి, కుటుంబ సభ్యుల బంగారు నగలను తాకట్టు పెట్టి లక్షల రూపాయలు చెల్లించారు. ఉద్యోగాలు రాకపోవడంతో పాటు చెల్లించిన డబ్బు కూడా తిరిగి రాక ఆర్థికంగా తీవ్ర ఇబ్బందులు ఎదుర్కొంటున్నారు.
గుంటూరుకు చెందిన ఓ బాధితుడు సాఫ్ట్వేర్ ఉద్యోగం కోల్పోయిన తర్వాత కుటుంబ సమస్యలను ఎదుర్కొన్నాడు. ఉద్యోగం లేకపోవడంతో అతని భార్య పుట్టింటికి వెళ్లిపోయింది. విదేశాల్లో ఉద్యోగం వస్తుందనే ఆశతో ఫ్లయింగ్ బోర్డర్స్ సంస్థను ఆశ్రయించిన అతను, రూ.2 వడ్డీపై అప్పు తీసుకుని రూ.5 లక్షలు చెల్లించాడు. అయితే ఉద్యోగం రాకపోగా, చెల్లించిన డబ్బు కూడా తిరిగి ఇవ్వలేదని వాపోయాడు.
మరోవైపు గుంటూరు నగరానికి చెందిన ఓ ఇంజినీరింగ్ పట్టభద్రుడు గతంలో సింగపూర్లో ఉద్యోగం చేసి భారత్కు తిరిగి వచ్చాడు. మళ్లీ విదేశాల్లో ఉద్యోగం కోసం ఈ ఏజెన్సీని సంప్రదించగా, కుటుంబ సభ్యులు వారించినప్పటికీ వారి మాటలు నమ్మి రెండు బంగారు గొలుసులను తాకట్టు పెట్టి రూ.5 లక్షలు చెల్లించాడు. రెండు ఇంటర్వ్యూలకు హాజరైనప్పటికీ ఉద్యోగం రాకపోగా, చెల్లించిన డబ్బు కూడా తిరిగి పొందలేకపోయినట్లు తెలిపాడు.
ఈ ఘటనపై బాధితుల ఫిర్యాదుల మేరకు పోలీసులు కేసు నమోదు చేసి దర్యాప్తు కొనసాగిస్తున్నారు. విదేశీ ఉద్యోగాల పేరుతో మోసాలకు పాల్పడుతున్న సంస్థల విషయంలో అప్రమత్తంగా ఉండాలని, అధికారిక అనుమతులు, గుర్తింపు ఉన్న రిక్రూట్మెంట్ ఏజెన్సీల ద్వారానే ఉద్యోగాల కోసం దరఖాస్తు చేసుకోవాలని అధికారులు ప్రజలకు సూచిస్తున్నారు.