DNews: Nov 22: న్యూఢిల్లీ: బీజేపీ ఎంపీ లక్ష్మణ్ తెలంగాణ ముఖ్యమంత్రి రేవంత్ రెడ్డి పై తీవ్ర ఆరోపణలు చేశారు. శనివారం మీడియాతో మాట్లాడిన ఆయన, రేవంత్ రెడ్డి పెద్ద ఎత్తున పారిశ్రామిక భూములను ఆక్రమిస్తూ భారీ స్కామ్ చేస్తున్నారని విమర్శించారు. దాదాపు పది వేల ఎకరాల పారిశ్రామిక భూములను పెద్దలతో కలసి కబ్జా చేస్తున్నారని ఆరోపించారు. ఢిల్లీకి పన్నులు చెల్లించేందుకు ఈ స్కామ్ చేస్తున్నారని లక్ష్మణ్ వ్యాఖ్యానించారు. ఆయన గుర్తు చేశారు, గతంలో కేటీఆర్ కూడా ఇంద్రపార్క్, ఎన్టీఆర్ స్టేడియం భూములను ఆక్రమించడానికి ప్రయత్నించగా, తాము అడ్డుకున్నామని చెప్పారు. పారిశ్రామిక భూములను ప్రజల ప్రయోజనాల కోసం మాత్రమే కేటాయించాలని, భూములను ఆక్రమించే విధానాన్ని కేబినెట్ వెనక్కి తీసుకోవాలని డిమాండ్ చేశారు. తెలంగాణలో బీజేపీ ఎంపీకి హైకమాండ్ ఇచ్చిన నోటీసు తన దృష్టికి రాలేదని తెలిపారు. జూబ్లీహిల్స్ ఉపఎన్నికలో ఓటమి కారణాలను సమీక్షిస్తామని, పార్టీకి ద్రోహం చేసిన ఎమ్మెల్యేల నియోజకవర్గాల్లో ఎన్నికలు తప్పనిసరిగా జరుగుతాయని అన్నారు. ఆ ఎన్నికల్లో బీజేపీ విజయం సాధిస్తుందని ధైర్యం వ్యక్తం చేశారు. త్వరలో తెలంగాణ బీజేపీకి మంచి రోజులు వస్తాయని ఆశాభావం వ్యక్తం చేశారు. బీజేపీ అధికారంలోకి వస్తే హైదరాబాద్లోని పారిశ్రామిక భూములను రక్షిస్తామని లక్ష్మణ్ హామీ ఇచ్చారు.