Mohammed Shami: టీమిండియా సీనియర్ పేసర్ మహమ్మద్ షమీ దేశవాళీ క్రికెట్‌లో తన అద్భుత ప్రదర్శనతో అదరగొడుతున్నాడు. రంజీ ట్రోఫీ 2026-27లో బెంగాల్ తరఫున ఆడుతున్న షమీ.. మహారాష్ట్రతో జరిగిన మ్యాచ్‌లో మరోసారి బంతితో మ్యాజిక్ చేశాడు. ఏకంగా 8 మెయిడిన్ ఓవర్లు వేసి, 37 పరుగులిచ్చి నాలుగు వికెట్లు పడగొట్టాడు. వరుస మ్యాచ్‌ల్లో వికెట్లు తీస్తూ భారత జట్టు సెలక్టర్లకు తన ఎంపికను మరోసారి గుర్తు చేస్తున్నాడు.
టీమిండియా అనుభవజ్ఞుడైన ఫాస్ట్ బౌలర్ మహమ్మద్ షమీ తన బౌలింగ్ పదును ఇంకా తగ్గలేదని నిరూపిస్తున్నాడు. రంజీ ట్రోఫీలో బెంగాల్ తరఫున బరిలోకి దిగుతున్న ఈ స్టార్ బౌలర్.. మహారాష్ట్రతో జరిగిన మ్యాచ్‌లో అద్భుత ప్రదర్శన చేశాడు. 23.5 ఓవర్లు బౌలింగ్ చేసి కేవలం 37 పరుగులు మాత్రమే ఇచ్చాడు. ఇందులో ఏకంగా 8 మెయిడిన్ ఓవర్లు ఉండగా.. నాలుగు కీలక వికెట్లు తన ఖాతాలో వేసుకున్నాడు. దీంతో అతడి ఎకానమీ 1.55గా నమోదైంది. ప్రత్యర్థి బ్యాటర్లకు ఏమాత్రం అవకాశం ఇవ్వకుండా కట్టుదిట్టమైన బౌలింగ్‌తో ఆకట్టుకున్నాడు.
మహారాష్ట్ర తొలి ఇన్నింగ్స్‌లో షమీ తన బౌలింగ్‌తో ప్రత్యర్థి జట్టును ఇబ్బందులకు గురిచేశాడు. స్టార్ ఓపెనర్ పృథ్వీ షాను 12 పరుగులకే పెవిలియన్‌కు పంపించాడు. అనంతరం సిద్ధేశ్ వీర్ (28), దిగ్విజయ్ పాటిల్ (0) వికెట్లు పడగొట్టాడు. చివర్లో ప్రదీప్ ధాదేను ఔట్ చేసి నాలుగు వికెట్ల ప్రదర్శనను పూర్తి చేశాడు. షమీ కచ్చితమైన లైన్ అండ్ లెంగ్త్‌తో పాటు అద్భుతమైన స్వింగ్‌ను రాబడుతూ బ్యాటర్లను కట్టడి చేశాడు.
అయితే షమీ వ్యక్తిగతంగా రాణించినప్పటికీ బెంగాల్ జట్టుకు మాత్రం ఈ మ్యాచ్‌లో విజయం దక్కలేదు. ఈడెన్ గార్డెన్స్ వేదికగా జరిగిన పోరులో బెంగాల్ తొలి ఇన్నింగ్స్‌లో 143 పరుగులకే ఆలౌటైంది. మహారాష్ట్ర తన తొలి ఇన్నింగ్స్‌లో 218 పరుగులు చేసి 75 పరుగుల ఆధిక్యాన్ని సాధించింది. రెండో ఇన్నింగ్స్‌లోనూ బెంగాల్ బ్యాటింగ్ విభాగం ఆశించిన స్థాయిలో రాణించలేకపోయింది. అభిషేక్ పోరెల్ 65, సుమంత్ గుప్తా 59 పరుగులతో పోరాడటంతో బెంగాల్ 186 పరుగులు చేసింది. దీంతో మహారాష్ట్రకు 112 పరుగుల లక్ష్యం లభించింది. ఈ లక్ష్యాన్ని పృథ్వీ షా (53), సచిన్ ధాస్ (61) అజేయ అర్ధశతకాలతో సులభంగా ఛేదించారు. మహారాష్ట్ర 10 వికెట్ల తేడాతో ఘన విజయం సాధించింది.
ఇదిలా ఉంటే, ఈ సీజన్‌లో షమీ నిలకడగా వికెట్లు తీస్తూ తన ఫామ్‌ను కొనసాగిస్తున్నాడు. ఢిల్లీతో జరిగిన మ్యాచ్‌లో తొలి ఇన్నింగ్స్‌లో నాలుగు వికెట్లు, రెండో ఇన్నింగ్స్‌లో మరో వికెట్ పడగొట్టి మొత్తం ఐదు వికెట్లు సాధించాడు. ఆ మ్యాచ్‌లో బెంగాల్ తొమ్మిది వికెట్ల తేడాతో గెలుపొందింది. అనంతరం కేరళతో జరిగిన పోరులోనూ షమీ తన జోరు చూపించాడు. తొలి ఇన్నింగ్స్‌లో మూడు, రెండో ఇన్నింగ్స్‌లో రెండు వికెట్లు తీసి మరోసారి ఐదు వికెట్ల ప్రదర్శన నమోదు చేశాడు. ఈ మ్యాచ్‌లో బెంగాల్ 287 పరుగుల భారీ తేడాతో విజయం సాధించింది.
వరుసగా మూడు మ్యాచ్‌ల్లోనూ అద్భుతంగా బౌలింగ్ చేస్తుండటంతో షమీ ఫిట్‌నెస్, ఫామ్‌పై ఆసక్తికర చర్చ జరుగుతోంది. ముఖ్యంగా కొత్త బంతితో స్వింగ్ రాబట్టడంలో, పాత బంతితోనూ వికెట్లు తీయడంలో అతడి నైపుణ్యం మరోసారి బయటపడుతోంది.
మరోవైపు దేశవాళీ క్రికెట్‌లో ఇంతగా రాణిస్తున్న షమీకి టీమిండియాలో ఎప్పుడు తిరిగి అవకాశం లభిస్తుందనే ప్రశ్న అభిమానుల్లో నెలకొంది. రంజీ ట్రోఫీలో వరుసగా వికెట్లు పడగొడుతుండటం సెలక్టర్ల దృష్టిని ఆకర్షించే అంశంగా మారింది. 2027 వన్డే ప్రపంచకప్‌ను దృష్టిలో ఉంచుకుని భారత జట్టు అనుభవజ్ఞులైన పేసర్ల సేవలను కోరుకుంటే షమీకి మరోసారి అవకాశం దక్కే సూచనలు ఉండవచ్చని క్రికెట్ అభిమానులు భావిస్తున్నారు.
అయితే టీమిండియాలో షమీ పునరాగమనంపై ఇప్పటివరకు ఎలాంటి అధికారిక ప్రకటన వెలువడలేదు. రంజీ ట్రోఫీలో ఇదే స్థాయి ప్రదర్శనను కొనసాగిస్తే సెలక్టర్ల నిర్ణయంపై మరింత ఆసక్తి పెరగడం ఖాయం. మరి తన బౌలింగ్‌తో మరోసారి సెలక్టర్లను మెప్పించి భారత జట్టులోకి షమీ రీఎంట్రీ ఇస్తాడేమో చూడాలి!