యాక్షన్ క్రైమ్ థ్రిల్లర్‌గా ఓటీటీలో సంచలనం సృష్టించిన ‘మీర్జాపూర్’ ఇప్పుడు సినిమాగా ప్రేక్షకుల ముందుకు రానుంది. ‘మీర్జాపూర్ ది మూవీ’ పేరుతో తెరకెక్కిన ఈ చిత్రాన్ని సెప్టెంబర్ 4న థియేటర్లలో విడుదల చేయనున్నారు. ఈ నేపథ్యంలో తాజాగా మూవీ ట్రైలర్‌ను మేకర్స్ విడుదల చేశారు.
అభిమానుల కోరికతోనే సినిమా..
‘మీర్జాపూర్’ సిరీస్‌కు ప్రేక్షకుల నుంచి లభించిన ఆదరణే సినిమాగా తెరకెక్కించడానికి ప్రధాన కారణమని నిర్మాత ఫర్హాన్ అక్తర్ తెలిపారు. 2018లో తొలి సీజన్ విడుదలైనప్పటి నుంచి ప్రేక్షకులు ఈ సిరీస్‌కు ఎంతో మద్దతుగా నిలిచారని చెప్పారు.
అమెజాన్ ప్రైమ్ ద్వారా ‘మీర్జాపూర్’ ప్రపంచవ్యాప్తంగా ప్రేక్షకులకు చేరువైందని ఫర్హాన్ అక్తర్ పేర్కొన్నారు. తాను ఎక్కడికి వెళ్లినా కొత్త సీజన్ ఎప్పుడు వస్తుందంటూ అభిమానులు అడిగేవారని తెలిపారు.
సినిమా ప్రకటన తర్వాత కూడా విడుదల తేదీ గురించి ప్రేక్షకులు ఆరా తీశారని.. అభిమానుల కోరిక మేరకే ‘మీర్జాపూర్ ది మూవీ’ని తీసుకొస్తున్నట్లు ఫర్హాన్ అక్తర్ వెల్లడించారు.
పాతవారితో పాటు కొత్త నటీనటులు
‘మీర్జాపూర్’కు చెందిన పాత తారాగణంతో పాటు కొత్త నటీనటులను కూడా సినిమాలో భాగం చేయడం ఆనందంగా ఉందని నిర్మాత తెలిపారు. ఇప్పటికే విడుదలైన ట్రైలర్ సినిమాపై అంచనాలను మరింత పెంచుతోంది.
ఓటీటీలో భారీ క్రేజ్ సంపాదించిన ‘మీర్జాపూర్’ సినిమాగా ఎలాంటి ప్రభావం చూపిస్తుందో చూడాలి. సెప్టెంబర్ 4న ‘మీర్జాపూర్ ది మూవీ’ థియేటర్లలో సందడి చేయనుంది.