D News: శ్రీశైలం నుంచి విద్యుత్ ఉత్పత్తి నిలిపివేయాలని కేఆర్ఎంబీ ఆదేశాలు ఇవ్వడంపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్రంగా స్పందించారు. కేఆర్ఎంబీ ఆదేశాలు తెలంగాణకు గొడ్డలిపెట్టు అని విమర్శించిన ఆయన.. కాంగ్రెస్ ప్రభుత్వ చేతగానితనం వల్లే రాష్ట్ర ప్రయోజనాలకు నష్టం జరుగుతోందని ఆరోపించారు.
కేఆర్ఎంబీ ఆదేశాలపై కేటీఆర్ ఫైర్
శ్రీశైలం నుంచి విద్యుత్ ఉత్పత్తిని నిలిపివేయాలని కేఆర్ఎంబీ ఆదేశించడం కాంగ్రెస్ ప్రభుత్వ వైఫల్యానికి నిదర్శనమని కేటీఆర్ అన్నారు. ఎల్నినో పేరుతో తెలంగాణ ప్రయోజనాలను దెబ్బతీస్తున్నారని ఆరోపించారు. వెలిగొండ ప్రాజెక్టుకు ఏ నిబంధనల ప్రకారం నీటిని తరలిస్తున్నారని ఆయన ప్రశ్నించారు.
ఏపీ నీటి తరలింపుపై ప్రశ్నలు
ఏపీ ప్రభుత్వం వెలిగొండకు సాగునీటిని తరలిస్తున్నా కేఆర్ఎంబీకి అది కనిపించడం లేదా అని కేటీఆర్ నిలదీశారు. మరోవైపు తెలంగాణ ప్రభుత్వం పాలమూరు-రంగారెడ్డి ఎత్తిపోతల పథకం పంపులను మూసుకుని సహకరిస్తోందని విమర్శించారు. ఏపీ ప్రభుత్వం ఆంధ్రా ప్రయోజనాల కోసం పనిచేస్తుంటే.. తెలంగాణ ప్రభుత్వం రాష్ట్ర ప్రయోజనాలను పట్టించుకోవడం లేదని ఆరోపించారు.
తెలంగాణ ప్రాజెక్టులపై ఆందోళన
విభజన చట్టంలోని 11వ షెడ్యూల్ ఒక్క తెలంగాణకే వర్తిస్తుందా అని కేటీఆర్ ప్రశ్నించారు. రేవంత్రెడ్డి అసమర్థ పాలనతో శ్రీశైలం, నాగార్జునసాగర్ రిజర్వాయర్లను ఏపీకి అప్పగించినట్టుగా వ్యవహరిస్తున్నారని విమర్శించారు. నాగార్జునసాగర్ ఎడమ కాలువ ఆయకట్టు, కల్వకుర్తి, జూరాల, నెట్టెంపాడు, భీమా ఎత్తిపోతల పథకాల కింద రైతులు ఇబ్బందులు పడుతున్నారని అన్నారు.
శ్రీశైలం నీటిపై కేటీఆర్ లెక్కలు
ఆగస్టు 21న శ్రీశైలం రిజర్వాయర్లో 169 టీఎంసీల నీరు ఉండగా.. ప్రస్తుతం 139 టీఎంసీలకు పడిపోయిందని కేటీఆర్ తెలిపారు. 15 రోజుల్లో 30 టీఎంసీల నీరు తగ్గిందని అన్నారు. కేఎల్ఐ ద్వారా అన్ని మోటార్లు నడిస్తే రోజుకు 2,400 క్యూసెక్కులు మాత్రమే ఎత్తిపోస్తారని, ప్రస్తుతం మూడు మోటార్లు మాత్రమే పనిచేస్తున్నాయని వివరించారు.
కాంగ్రెస్ వైఫల్యాలను ఎండగడతాం
కృష్ణా జలాలను ఏపీ యథేచ్ఛగా తరలిస్తున్నా కాంగ్రెస్ ప్రభుత్వంలో ఎలాంటి చలనం లేదని కేటీఆర్ విమర్శించారు. కాంగ్రెస్ ప్రభుత్వ చేతగానితనం వల్లే తెలంగాణకు ఈ పరిస్థితి వచ్చిందని మండిపడ్డారు. ప్రభుత్వ వైఫల్యాలను ప్రజాక్షేత్రంలో ఎండగడతామని, ఈ అసమర్థ ప్రభుత్వానికి బుద్ధి చెబుతామని స్పష్టం చేశారు.