D NEWS: తెలంగాణలో వర్షాభావ పరిస్థితులతో కరువు తీవ్రత పెరుగుతోందని తెలంగాణ రక్షణ సేన అధ్యక్షురాలు కల్వకుంట్ల కవిత అన్నారు. హైదరాబాద్‌లో నిర్వహించిన మీడియా సమావేశంలో రాష్ట్రంలో రైతులు ఎదుర్కొంటున్న సమస్యలు, విద్యుత్, సాగునీరు, తాగునీరు వంటి అంశాలపై ప్రభుత్వాన్ని ప్రశ్నించారు.
జులై, ఆగస్టు, సెప్టెంబర్ నెలల్లో తక్కువ వర్షపాతం నమోదైందని కవిత పేర్కొన్నారు. కొన్ని ప్రాంతాల్లో భూగర్భ జలాలు పడిపోవడంతో రైతులు పంటలను కాపాడుకోలేకపోతున్నారని అన్నారు. సూపర్ ఎల్‌నినో హెచ్చరికలు ఉన్నప్పటికీ ప్రభుత్వం ముందస్తు చర్యలు చేపట్టలేదని ఆమె ఆరోపించారు.
రైతుల పంటలను కాపాడేందుకు నవంబర్ వరకు 24 గంటల ఉచిత విద్యుత్ అందించాలని కవిత డిమాండ్ చేశారు. గ్రామాల్లో కనీస విద్యుత్ సరఫరా కూడా సరిగా లేదని ఆమె పేర్కొన్నారు. రాష్ట్ర ప్రభుత్వం వెంటనే ప్రత్యేక కేబినెట్ సమావేశం నిర్వహించి కరువు మండలాలను గుర్తించి కేంద్ర సాయం కోరాలని సూచించారు.
రాష్ట్రంలో రాబోయే రోజుల్లో తాగునీటి సమస్య తీవ్రమయ్యే అవకాశం ఉందని కవిత హెచ్చరించారు. రిజర్వాయర్ల నీటి పరిస్థితి, కృష్ణా జలాల వినియోగం, సాగునీటి ప్రాజెక్టుల నిర్వహణపై ప్రభుత్వం ప్రత్యేక దృష్టి పెట్టాలని కోరారు. రైతుల సమస్యలపై తమ పార్టీ ప్రతినిధులు గ్రామాల వారీగా పర్యటించి కార్యాచరణ చేపడతారని తెలిపారు.
ప్రభుత్వ ఆస్పత్రులు, ఉపాధ్యాయులు, ఎన్నికల వ్యవస్థకు సంబంధించిన అంశాలపైనా కవిత పలు వ్యాఖ్యలు చేశారు. ప్రభుత్వ ఆస్పత్రుల పరిస్థితిని పరిశీలించేందుకు ‘ఆపరేషన్ బ్లూ కోడ్’ కొనసాగిస్తామని, పాఠశాలల్లో మౌలిక సదుపాయాలను పరిశీలించేందుకు ప్రత్యేక బృందాలను ఏర్పాటు చేస్తామని చెప్పారు. ఎన్నికల్లో పేపర్ బ్యాలెట్ విధానం కోసం పోరాటం చేస్తామని, ఖైరతాబాద్ ఉపఎన్నికతో పాటు భవిష్యత్ ఎన్నికల్లో తమ పార్టీ పోటీకి సిద్ధంగా ఉందని కవిత తెలిపారు.