తెలంగాణ జీఎస్టీ ఆదాయంలో హైదరాబాద్ కీలక వాటాను కొనసాగిస్తోంది. రాష్ట్రంలో నమోదైన జీఎస్టీ పన్ను చెల్లింపుదారుల్లో 69 శాతం మంది హైదరాబాద్లోనే ఉన్నారు. ఆగస్టు నెలలో రాష్ట్ర జీఎస్టీ వసూళ్లలో నగరం ఏకంగా 91.1 శాతం వాటాను నమోదు చేసింది.
ఆగస్టులో హైదరాబాద్ నుంచి రూ.3,956 కోట్ల జీఎస్టీ ఆదాయం సమకూరింది. మరోవైపు ఏప్రిల్ నుంచి ఆగస్టు వరకు రాష్ట్రంలో జీఎస్టీ, వ్యాట్ వసూళ్లు కలిపి రూ.36,636 కోట్లకు చేరాయి. గతంతో పోలిస్తే ఈ వసూళ్లు 16.39 శాతం పెరిగాయి.
హైదరాబాద్లో విస్తరిస్తున్న ఐటీ, ఫార్మా, రియల్ ఎస్టేట్ రంగాల కార్యకలాపాలు పన్ను ఆదాయం పెరగడానికి ప్రధాన కారణాలుగా నిలుస్తున్నాయి. రాష్ట్ర ఆర్థిక వ్యవస్థలో హైదరాబాద్ ప్రాధాన్యం ఎంతగా ఉందో తాజా జీఎస్టీ గణాంకాలు మరోసారి స్పష్టం చేస్తున్నాయి.
తెలంగాణ వాణిజ్య పన్నుల ఆదాయంలో హైదరాబాద్ కీలకంగా నిలుస్తోంది. రాష్ట్రంలో నమోదైన జీఎస్టీ పన్ను చెల్లింపుదారుల్లో సుమారు 69 శాతం మంది హైదరాబాద్లోనే ఉన్నారు. ఆగస్టులో రాష్ట్ర మొత్తం జీఎస్టీ వసూళ్లలో నగరం ఏకంగా 91.1 శాతం వాటాను నమోదు చేసింది.
హైదరాబాద్లో ఆగస్టు జీఎస్టీ వసూళ్లు గత ఏడాది ఇదే నెలతో పోలిస్తే 20.53 శాతం పెరిగి రూ.3,956 కోట్లకు చేరాయి. రాష్ట్ర వాణిజ్య పన్నుల శాఖ గణాంకాల ప్రకారం తెలంగాణలో సుమారు 5.8 లక్షల మంది జీఎస్టీ పన్ను చెల్లింపుదారులు నమోదై ఉన్నారు. వీరిలో దాదాపు 4 లక్షల మంది హైదరాబాద్లోనే ఉన్నారు.
అంటే రాష్ట్రంలో నమోదైన ప్రతి 10 మంది జీఎస్టీ చెల్లింపుదారుల్లో సుమారు ఏడుగురు హైదరాబాద్కు చెందినవారే. ఆగస్టులో తెలంగాణ మొత్తం రూ.4,341 కోట్ల జీఎస్టీ ఆదాయం సాధించగా.. అందులో హైదరాబాద్ నుంచే రూ.3,956 కోట్లు సమకూరడం గమనార్హం. దీంతో రాష్ట్ర జీఎస్టీ ఆదాయంలో హైదరాబాద్ ప్రాధాన్యం మరోసారి స్పష్టమైంది.
పన్ను చెల్లింపుదారుల సంఖ్యతో పోలిస్తే హైదరాబాద్ నుంచి జీఎస్టీ ఆదాయం గణనీయంగా ఎక్కువగా రావడానికి నగరంలో అధిక విలువ కలిగిన ఆర్థిక కార్యకలాపాలు కేంద్రీకృతమై ఉండటమే ప్రధాన కారణంగా తెలుస్తోంది. ఐటీ, ఐటీఈఎస్, ఫార్మా, రియల్ ఎస్టేట్ రంగాలకు హైదరాబాద్ ప్రధాన కేంద్రంగా ఉండటంతో పెద్ద మొత్తంలో పన్ను పరిధిలోకి వచ్చే వ్యాపార లావాదేవీలు జరుగుతున్నాయి.
హైదరాబాద్లో ఒక్కో నమోదిత పన్ను చెల్లింపుదారుపై సగటు జీఎస్టీ వసూళ్లు సుమారు రూ.98,900గా ఉండగా.. రాష్ట్ర సగటు రూ.74,845గా ఉంది. దీంతో రాష్ట్రంలోని ఇతర ప్రాంతాలతో పోలిస్తే హైదరాబాద్ నుంచి ఒక్కో పన్ను చెల్లింపుదారుడి ద్వారా వచ్చే ఆదాయం ఎక్కువగా ఉన్నట్లు తెలుస్తోంది.
మరోవైపు, ప్రస్తుత ఆర్థిక సంవత్సరం తొలి ఐదు నెలల్లో తెలంగాణ పరోక్ష పన్నుల ఆదాయం కూడా గణనీయమైన వృద్ధిని నమోదు చేసింది. ఏప్రిల్ నుంచి ఆగస్టు వరకు జీఎస్టీ, వ్యాట్ కలిపి రాష్ట్రానికి రూ.36,636 కోట్ల ఆదాయం వచ్చింది. గత ఏడాది ఇదే కాలంలో నమోదైన రూ.31,477 కోట్లతో పోలిస్తే ఇది 16.39 శాతం అధికం.
ఈ ఐదు నెలల కాలంలో తెలంగాణకు గత ఏడాదితో పోలిస్తే అదనంగా రూ.5,159 కోట్ల ఆదాయం సమకూరింది. హైదరాబాద్ కేంద్రంగా సాగుతున్న అధిక విలువైన వ్యాపార కార్యకలాపాలు, రాష్ట్రవ్యాప్తంగా పన్ను వసూళ్ల పెరుగుదల తెలంగాణ వాణిజ్య పన్నుల ఆదాయానికి బలమైన ఊతమిస్తున్నట్లు తాజా గణాంకాలు సూచిస్తున్నాయి.
ఏప్రిల్-ఆగస్టు 2025 మధ్య తెలంగాణలో రూ.17,414 కోట్లుగా ఉన్న జీఎస్టీ వసూళ్లు.. 2026లో రూ.20,862 కోట్లకు పెరిగాయి. దీంతో 19.80 శాతం వృద్ధి నమోదై, రాష్ట్ర ఖజానాకు అదనంగా రూ.3,448 కోట్ల ఆదాయం సమకూరింది. ఇదే సమయంలో వ్యాట్ వసూళ్లు కూడా రూ.14,063 కోట్ల నుంచి రూ.15,774 కోట్లకు పెరిగాయి. దీంతో 12.16 శాతం వృద్ధి నమోదైంది.
ఆగస్టు నెలలోనూ పన్ను వసూళ్లు పెరిగాయి. గత ఏడాది ఆగస్టులో రూ.3,641 కోట్లుగా ఉన్న జీఎస్టీ ఆదాయం.. ఈ ఏడాది రూ.4,341 కోట్లకు చేరింది. వ్యాట్ వసూళ్లు కూడా రూ.2,712 కోట్ల నుంచి రూ.3,193 కోట్లకు పెరిగాయి. దీంతో ఆగస్టులో జీఎస్టీ, వ్యాట్ కలిపి తెలంగాణకు రూ.7,534 కోట్ల నెలవారీ ఆదాయం సమకూరింది.