ఏపీలో ఆలయాల నిర్మాణాలకు సర్కార్ కీలక నిర్ణయం

D Spiritual: Sept 2: రాష్ట్రవ్యాప్తంగా 5,000 ఆలయాల నిర్మాణానికి వేగం

ఆంధ్రప్రదేశ్ రాష్ట్రవ్యాప్తంగా 5,000 ఆలయాల నిర్మాణ ప్రక్రియను వేగవంతం చేయాలని ముఖ్యమంత్రి నారా చంద్రబాబు నాయుడు అధికారులను ఆదేశించారు. దేవాలయాల నిర్మాణం, అభివృద్ధిపై సంబంధిత అధికారులతో నిర్వహించిన సమీక్షా సమావేశంలో సీఎం కీలక నిర్ణయాలు తీసుకున్నారు.

రాష్ట్రంలోని 28 జిల్లాల నుంచి మొత్తం 4,192 ఆలయాల నిర్మాణానికి సంబంధించిన సవివరమైన ప్రతిపాదనలు అందినట్లు అధికారులు ముఖ్యమంత్రికి వివరించారు. వీటిలో ఇప్పటికే 967 ఆలయాల నిర్మాణ పనులు విజయవంతంగా పూర్తయినట్లు వెల్లడించారు. మిగిలిన ఆలయాల నిర్మాణ పనులను కూడా వేగంగా పూర్తి చేసి భక్తులకు అందుబాటులోకి తీసుకురావాలని సీఎం అధికారులను ఆదేశించారు.

శ్రీవాణి ట్రస్ట్ నిధుల వినియోగంపై స్పష్టత

తిరుమల తిరుపతి దేవస్థానం (టీటీడీ) ఆధ్వర్యంలో కొనసాగుతున్న ధార్మిక, విద్యా, వైద్య సేవల పురోగతిని కూడా సీఎం చంద్రబాబు సమీక్షించారు. ఈ సందర్భంగా శ్రీవాణి ట్రస్ట్ ద్వారా సమకూరే నిధుల వినియోగంపై అధికారులకు స్పష్టమైన ఆదేశాలు జారీ చేశారు.

శ్రీవాణి ట్రస్ట్ నిధులను ప్రధానంగా ఆలయాల నిర్మాణం, అభివృద్ధి, సనాతన ధార్మిక కార్యక్రమాల వ్యాప్తికి వినియోగించాలని సీఎం స్పష్టం చేశారు. ఆధ్యాత్మిక వాతావరణాన్ని మరింత పెంపొందించడంతో పాటు గ్రామీణ ప్రాంతాల్లో ధార్మిక ప్రచారాన్ని బలోపేతం చేసే దిశగా చర్యలను వేగవంతం చేయాలని అధికారులకు సూచించారు.