D Spiritual: Nov 18: తిరుమలలో వైకుంఠ ద్వార దర్శనానికి భారీ ఏర్పాట్లు.. 8.34 లక్షల మందికి అవకాశం!

సామాన్య భక్తులకు 92 శాతం దర్శనాలు.. తొలి రెండు రోజులు ఆన్‌లైన్ డిప్ ద్వారా 1.60 లక్షల ఉచిత టోకెన్లు.. మిగిలిన రోజుల్లో రోజుకు 15 వేల ప్రత్యేక ప్రవేశ టికెట్లు!

తిరుపతి: తిరుమల శ్రీవేంకటేశ్వరస్వామి ఆలయంలో డిసెంబరు 20 నుంచి 29 వరకు పది రోజుల పాటు నిర్వహించనున్న వైకుంఠ ఏకాదశి ఉత్సవాలకు టీటీడీ విస్తృత ఏర్పాట్లు చేస్తోంది. ఈసారి మొత్తం 8.34 లక్షల మంది భక్తులకు వైకుంఠ ద్వార దర్శనం కల్పించాలని నిర్ణయించింది. ఇందులో 92 శాతం దర్శనాలను సామాన్య భక్తులకు కేటాయించనుంది. ఈ మేరకు తిరుమలలోని అన్నమయ్య భవనంలో స్పెసిఫైడ్ అథారిటీ ఛైర్మన్ ఎం.రవిచంద్ర అధ్యక్షతన జరిగిన సమావేశంలో కీలక నిర్ణయాలు తీసుకున్నారు. సభ్యులు వినయ్‌చంద్, కె.కన్నబాబు ఈ సమావేశంలో పాల్గొన్నారు.

గత ఏడాది వైకుంఠ ద్వార దర్శన సమయంలో 7,83,413 మంది భక్తులు స్వామివారిని దర్శించుకోగా, ఈసారి ఆ సంఖ్యను 8,34,000కు పెంచాలని నిర్ణయించారు. భక్తుల రద్దీని దృష్టిలో ఉంచుకుని దర్శన ఏర్పాట్లు, టోకెన్ల జారీ, క్యూలైన్ల నిర్వహణపై అధికారులు ప్రత్యేక దృష్టి సారించనున్నారు.

తొలి రెండు రోజులు ఆన్‌లైన్ డిప్ ద్వారా 1.60 లక్షల ఉచిత టోకెన్లు!

ఈ ఏడాది వైకుంఠ ద్వార దర్శనంలో మొదటి రెండు రోజులు ఆన్‌లైన్ డిప్ ద్వారా ఎంపికైన భక్తులకు మాత్రమే దర్శన అవకాశం కల్పించనున్నారు. ఈ రెండు రోజులకు కలిపి మొత్తం 1,60,000 ఉచిత ఎస్‌ఎస్‌డీ టోకెన్లు జారీ చేయాలని నిర్ణయించారు. గత ఏడాది తొలి మూడు రోజులకు 1,80,000 టోకెన్లు విడుదల చేయగా, ఈసారి రెండు రోజులకే పరిమితం చేశారు. ఆన్‌లైన్ డిప్ ద్వారా ఎంపికైన టోకెన్లు ఉన్న భక్తులనే తొలి రెండు రోజులు దర్శనానికి అనుమతించనున్నారు.

మిగిలిన 8 రోజులు సర్వదర్శనం.. రోజుకు 15 వేల ప్రత్యేక ప్రవేశ టికెట్లు!

తొలి రెండు రోజుల అనంతరం మిగిలిన ఎనిమిది రోజుల్లో సాధారణ సర్వదర్శనంతో పాటు ప్రత్యేక ప్రవేశ దర్శన టికెట్లను కూడా అందుబాటులో ఉంచనున్నారు. రోజుకు 15,000 చొప్పున రూ.300 ప్రత్యేక ప్రవేశ దర్శన టికెట్లను జారీ చేయాలని నిర్ణయించారు. వైకుంఠ ద్వార దర్శనానికి సంబంధించిన టోకెన్లు, టికెట్ల విడుదల తేదీలను త్వరలోనే అధికారికంగా ప్రకటించనున్నట్లు టీటీడీ ఛైర్మన్ వెల్లడించారు.

సామాన్య భక్తులకే 92 శాతం దర్శనాలు!

వైకుంఠ ద్వార దర్శనానికి వచ్చే సామాన్య భక్తులకు ప్రాధాన్యత కల్పించేలా మొత్తం 8.34 లక్షల దర్శనాల్లో 92 శాతం వారికే కేటాయించాలని నిర్ణయించారు. దీనివల్ల ఎలాంటి సిఫార్సులు లేకుండా వచ్చే సాధారణ భక్తులకు కూడా వైకుంఠ ద్వార దర్శనం చేసుకునే అవకాశం కల్పించనున్నారు. భక్తులందరికీ సౌకర్యవంతంగా దర్శనం కల్పించడమే లక్ష్యంగా టీటీడీ ఈ నిర్ణయం తీసుకుంది.

శ్రీవారి నిత్య కైంకర్యాలకు సొంతంగా నెయ్యి ఉత్పత్తి!

మరోవైపు తిరుమల శ్రీవారి ఆలయంలో నిత్య కైంకర్యాలకు అవసరమైన స్వచ్ఛమైన నెయ్యిని సొంతంగా ఉత్పత్తి చేసుకునేందుకు టీటీడీ కీలక నిర్ణయం తీసుకుంది. ప్రతిరోజూ సుమారు 80 కిలోల నెయ్యి అవసరమవుతుండగా, ఇందుకోసం రూ.7.5 కోట్ల వ్యయంతో 500 దేశీ ఆవులను సేకరించాలని నిర్ణయించింది. ఈ ప్రతిపాదనకు స్పెసిఫైడ్ అథారిటీ సమావేశం ఆమోదం తెలిపింది. సొంతంగా నెయ్యి ఉత్పత్తి చేసుకోవడం ద్వారా ఆలయ అవసరాలకు నాణ్యమైన నెయ్యిని సమకూర్చుకోవాలని టీటీడీ భావిస్తోంది.

ఈ సమావేశంలో టీటీడీ అదనపు ఈవో వెంకయ్య చౌదరి, జేఈవోలు శరత్, ప్రభల గోపీనాథ్, సీవీఎస్‌వో మురళీకృష్ణ తదితర అధికారులు పాల్గొన్నారు. వైకుంఠ ఏకాదశి ఉత్సవాలకు సంబంధించిన దర్శన టికెట్లు, టోకెన్ల విడుదల తేదీలపై టీటీడీ త్వరలోనే అధికారిక ప్రకటన చేయనుంది.

Leave a Reply

Your email address will not be published. Required fields are marked *