గంటల్లోనే బంగారం ధరలు తారుమారు.. సాయంత్రం నాటికి భారీగా పెరుగుదల.. ఇప్పుడు తులం ఎంతంటే..?

D News: Jul 9: బంగారం ధరలు మరోసారి కొనుగోలుదారులకు షాక్ ఇచ్చాయి. గత కొన్ని రోజులుగా తగ్గుముఖం పట్టిన పసిడి ధరలు గురువారం సాయంత్రానికి ఒక్కసారిగా భారీగా పెరిగాయి. ఉదయం వరకు స్వల్పంగా తగ్గిన ధరలు, కొన్ని గంటల్లోనే గణనీయంగా పెరగడంతో మార్కెట్లో అనూహ్య మార్పులు చోటుచేసుకున్నాయి. అంతర్జాతీయంగా నెలకొన్న ఉద్రిక్త పరిస్థితుల ప్రభావంతో బంగారం, వెండి ధరల్లో తీవ్ర హెచ్చుతగ్గులు కనిపిస్తున్నాయని నిపుణులు చెబుతున్నారు.

అమెరికా-ఇరాన్ మధ్య ఉద్రిక్తతలు మళ్లీ పెరగడం, ఇరాన్‌తో శాంతి ఒప్పందం ముగిసిందంటూ అమెరికా అధ్యక్షుడు డొనాల్డ్ ట్రంప్ చేసిన ప్రకటన నేపథ్యంలో అంతర్జాతీయ మార్కెట్లలో అనిశ్చితి పెరిగింది. దీంతో పెట్టుబడిదారులు సురక్షిత పెట్టుబడిగా భావించే బంగారం వైపు మొగ్గు చూపడంతో పసిడి ధరలు మళ్లీ పెరిగాయి. ఈ పరిస్థితులు కొనసాగినంత కాలం బంగారం, వెండి ధరల్లో అస్థిరత కొనసాగే అవకాశం ఉందని మార్కెట్ నిపుణులు అభిప్రాయపడుతున్నారు.

హైదరాబాద్‌లో 10 గ్రాముల 24 క్యారెట్ల బంగారం ధర రూ.1,44,440కు చేరగా, ఒక్కరోజులోనే రూ.1,310 పెరిగింది. 22 క్యారెట్ల బంగారం ధర రూ.1,32,400గా నమోదై రూ.1,200 పెరుగుదల కనిపించింది. చెన్నైలో 24 క్యారెట్ల బంగారం ధర రూ.1,44,220 కాగా, 22 క్యారెట్ల ధర రూ.1,32,200గా ఉంది. బెంగళూరులో 24 క్యారెట్ల బంగారం రూ.1,44,440, 22 క్యారెట్ల బంగారం రూ.1,32,400 వద్ద ట్రేడవుతోంది.

దేశ రాజధాని ఢిల్లీలో 24 క్యారెట్ల బంగారం ధర రూ.1,44,590కు చేరగా, 22 క్యారెట్ల ధర రూ.1,32,550గా నమోదైంది. ముంబైలో 24 క్యారెట్ల బంగారం రూ.1,44,440, 22 క్యారెట్ల బంగారం రూ.1,32,400 వద్ద కొనసాగుతోంది. భారత బులియన్ మార్కెట్లో కూడా 24 క్యారెట్ల బంగారం ధర రూ.1,44,440గా, 22 క్యారెట్ల బంగారం ధర రూ.1,32,400గా నమోదైంది.

వెండి ధరలు కూడా అధిక స్థాయిలోనే కొనసాగుతున్నాయి. విజయవాడ, హైదరాబాద్, చెన్నై నగరాల్లో కిలో వెండి ధర రూ.2.45 లక్షలుగా ఉండగా, బెంగళూరులో కిలో వెండి రూ.2.35 లక్షల వద్ద ట్రేడవుతోంది. అంతర్జాతీయ మార్కెట్ పరిణామాలను బట్టి రానున్న రోజుల్లో బంగారం, వెండి ధరల్లో మరిన్ని మార్పులు చోటుచేసుకునే అవకాశం ఉందని నిపుణులు సూచిస్తున్నారు.