D News: Aug 1: రాష్ట్ర ఐటీ, మానవ వనరుల శాఖ మంత్రి నారా లోకేశ్ భోగాపురం అంతర్జాతీయ విమానాశ్రయం ప్రారంభోత్సవ కార్యక్రమంలో మాట్లాడుతూ ఉత్తరాంధ్ర అభివృద్ధిపై కీలక వ్యాఖ్యలు చేశారు. గతంలో “ఎర్ర బస్సు కూడా రాని చోటుకు ఎయిర్బస్ అవసరమా?” అంటూ ఎగతాళి చేసిన ప్రాంతంలోనే నేడు అంతర్జాతీయ విమానాశ్రయం నిర్మించామని ఆయన పేర్కొన్నారు. ఈ విమానాశ్రయం ఉత్తరాంధ్ర ప్రజల ఆకాంక్షలకు నిదర్శనమని, ప్రాంతాన్ని తక్కువగా చూసిన వారికి ఇది గట్టి సమాధానమని అన్నారు.
ఉత్తరాంధ్ర ప్రజలను గతంలో కొందరు అవమానించారని విమర్శించిన లోకేశ్, ఇప్పుడు అదే ప్రాంతానికి ప్రధాని నరేంద్ర మోదీ రావడం అభివృద్ధికి నిదర్శనమని వ్యాఖ్యానించారు. “ఎర్ర బస్సు రాదన్న చోట ఎయిర్పోర్టు వచ్చింది.. మన ప్రధాని మోదీ వచ్చారు. ఇదే మన ఉత్తరాంధ్ర దెబ్బ” అంటూ ఆయన ప్రత్యర్థులను ఉద్దేశించి వ్యాఖ్యలు చేశారు.
ప్రధాని నరేంద్ర మోదీ సహకారంతోనే ఆంధ్రప్రదేశ్లో అనేక అభివృద్ధి కార్యక్రమాలు వేగంగా అమలవుతున్నాయని లోకేశ్ తెలిపారు. రాష్ట్ర పురోగతికి కేంద్ర ప్రభుత్వం పూర్తి సహకారం అందిస్తోందని పేర్కొన్నారు. ఈ సందర్భంగా “నమో అంటే హిమ్మత్ (ధైర్యం), విశ్వాస్ (నమ్మకం), సురక్షిత్ భారత్ (సురక్షిత భారతం)” అని ఆయన వ్యాఖ్యానించారు.
ఉత్తరాంధ్రలో సహజ వనరులు సమృద్ధిగా ఉన్నాయని, వాటి వినియోగానికి భోగాపురం అంతర్జాతీయ విమానాశ్రయం కీలక పాత్ర పోషిస్తుందని లోకేశ్ అభిప్రాయపడ్డారు. ఈ విమానాశ్రయం ద్వారా పెట్టుబడులు, పరిశ్రమలు, పర్యాటకం, ఉపాధి అవకాశాలు మరింత పెరుగుతాయని, ఇది రాష్ట్ర ఆర్థికాభివృద్ధికి ఒక “పవర్ ఇంజిన్”గా మారుతుందని ఆయన విశ్వాసం వ్యక్తం చేశారు.
అలాగే విమానాశ్రయ నిర్మాణ పనులను వేగంగా పూర్తి చేసిన జీఎంఆర్ సంస్థను మంత్రి నారా లోకేశ్ ప్రత్యేకంగా అభినందించారు. నిర్ణీత గడువులో అత్యాధునిక ప్రమాణాలతో ఈ ప్రతిష్ఠాత్మక ప్రాజెక్టును పూర్తి చేసినందుకు సంస్థ ప్రతినిధులకు ఆయన కృతజ్ఞతలు తెలిపారు.