D Spiritual: Sept 25: ట్యాంక్‌బండ్ పరిసరాల్లో డీజేలపై కఠిన ఆంక్షలు
ఖైరతాబాద్ గణేష్ నిమజ్జన శోభాయాత్ర నేపథ్యంలో ట్యాంక్‌బండ్ పరిసరాల్లో డీజే సౌండ్ సిస్టమ్‌లపై పోలీసులు కఠిన ఆంక్షలు విధించారు. సైఫాబాద్ ఏసీపీ సంజయ్ కుమార్ ఈ మేరకు స్పష్టమైన ఆదేశాలు జారీ చేశారు. ట్యాంక్‌బండ్ పరిసరాల్లో డీజేలకు ఎలాంటి అనుమతి ఉండదని, నిబంధనలు కచ్చితంగా అమలు చేస్తామని ఆయన తెలిపారు. నిమజ్జన వేడుకలు ప్రశాంతంగా జరిగేలా ఈ నిర్ణయం తీసుకున్నట్లు వెల్లడించారు.
పోలీసుల కమ్యూనికేషన్‌కు అంతరాయం కలగకుండా..
నిమజ్జన సమయంలో భద్రతా ఏర్పాట్లు, ట్రాఫిక్ నియంత్రణ చేపట్టే పోలీసుల మధ్య కమ్యూనికేషన్‌కు డీజేల అధిక శబ్దం తీవ్ర అంతరాయం కలిగిస్తోందని ఏసీపీ సంజయ్ కుమార్ తెలిపారు. డీజేల్లో ఏ పాటలు ప్లే చేస్తున్నారనే అంశంతో పోలీసులకు ఎలాంటి సంబంధం లేదని, కేవలం అధిక శబ్దం కారణంగా విధులకు ఆటంకం ఏర్పడటమే ప్రధాన సమస్య అని స్పష్టం చేశారు.
భద్రతా సిబ్బంది మధ్య సమన్వయం సక్రమంగా కొనసాగేందుకు డీజేలకు సంబంధించిన ఆంక్షలను ప్రతి ఒక్కరూ తప్పనిసరిగా పాటించాలని పోలీసులు సూచించారు. నిమజ్జన మార్గాల్లో విధులు నిర్వహించే సిబ్బందికి సమాచార మార్పిడి సులభంగా ఉండేలా ఈ నిబంధనలను అమలు చేస్తున్నట్లు తెలిపారు.
నిబంధనలు పాటించాలని పోలీసుల విజ్ఞప్తి
గణేష్ నిమజ్జన శోభాయాత్ర ఎలాంటి అవాంఛనీయ ఘటనలు లేకుండా ప్రశాంతంగా జరిగేందుకు ప్రజలు, యువత పోలీసులకు సహకరించాలని అధికారులు కోరారు. నిబంధనలను ఉల్లంఘించి డీజేలు ఏర్పాటు చేస్తే చట్టపరమైన చర్యలు తీసుకుంటామని హెచ్చరించారు.
ప్రతి ఒక్కరూ బాధ్యతగా వ్యవహరించి పోలీసుల సూచనలు పాటించాలని, నిమజ్జన వేడుకలను ప్రశాంతమైన వాతావరణంలో నిర్వహించేందుకు సహకరించాలని అధికారులు విజ్ఞప్తి చేశారు.