DNews: Nov 24: హైదరాబాద్ పోలీస్ కమిషనర్ సజ్జనార్ నగరంలో రాత్రి వేళల్లో పోలీసింగ్ను మరింత బలోపేతం చేస్తున్నట్లు తెలిపారు. ప్రజా సంక్షేమ పోలీసింగ్లో భాగంగా ఆయన స్వయంగా ఆకస్మిక పర్యటనలు చేస్తూ, ఫీల్డ్ స్థాయిలో సిబ్బంది ఎలా స్పందిస్తున్నారో ప్రత్యక్షంగా పరిశీలిస్తున్నారు. ఆదివారం అర్ధరాత్రి 12 గంటల నుండి ఉదయం 3 గంటల వరకు సౌత్ వెస్ట్ జోన్లోని లంగర్ హౌస్, టోలిచౌకీ పోలీస్ స్టేషన్ల పరిధిలోని రహదారులు, ముఖ్య ప్రాంతాలు, సున్నితమైన ప్రాంతాలను ఆయన పరిశీలించారు. రౌడీ షీటర్ల ఇళ్లకు వెళ్లి వారిని నిద్రలేపి, వారి క్రిమినల్ చరిత్ర, ప్రస్తుత జీవనశైలి, ఉపాధి పరిస్థితులు, సామాజిక ధోరణుల గురించి విచారించి, తిరిగి నేరాలకు పాల్పడితే కఠిన చర్యలు తీసుకుంటామని హెచ్చరించారు.
టోలిచౌకీ ప్రాంతంలోని హోటళ్లు, దుకాణాలు, రాత్రివేళల్లో తెరిచి ఉన్న వ్యాపార సంస్థలను పరిశీలించిన సజ్జనార్, నియమావళిని ఉల్లంఘిస్తే కఠిన చర్యలు తీసుకుంటామని వ్యాపారులను హెచ్చరించారు. రాత్రి పహారా సిబ్బంది అప్రమత్తత స్థాయి, ప్రజల భద్రత కోసం తీసుకుంటున్న చర్యలపై ప్రత్యక్షంగా విచారణ చేశారు. కానిస్టేబుళ్లు, అధికారులు విధుల్లో ఉన్న వారిని కలుసుకుని, పహారా పాయింట్ల పరిష్కారం, ఇతర సమస్యలపై వివరాలు తెలుసుకున్నారు. అనంతరం టోలిచౌకీ పోలీస్ స్టేషన్ను సందర్శించి, స్టేషన్ జనరల్ డైరీ, రాత్రి నమోదు చేసిన ఎంట్రీలు, విధుల్లో ఉన్న సిబ్బంది హాజరు వివరాలు, వారికి అప్పగించిన బాధ్యతలను సమగ్రంగా పరిశీలించారు.
ఈ సందర్భంగా సజ్జనార్ మాట్లాడుతూ, సిబ్బంది కనిపించే పోలీసింగ్కు ప్రాధాన్యత ఇవ్వాలని సూచించారు. నగరంలో నేరాలపై కఠిన పర్యవేక్షణ కొనసాగుతుందని స్పష్టం చేశారు. హైదరాబాద్ నగర భద్రత కోసం ఎల్లప్పుడూ అప్రమత్తంగా ఉండాలని పోలీసులకు ఆదేశించారు. ప్రజల సమస్యలకు తక్షణమే స్పందించేలా పోలీస్ బృందాలను సిద్ధంగా ఉంచాలని అధికారులకు సూచించారు.