Blinkit Ambulance Service: బ్లింకిట్ అంబులెన్స్ సేవల్లో కీలక మార్పులు చేసింది. అత్యవసరం కాని ప్రయాణాలకు ఇకపై రూ.2,500 వసూలు చేయాలని నిర్ణయించింది. అయితే ప్రాణాపాయ పరిస్థితుల్లో ఉన్నవారికి అంబులెన్స్ సేవలు ఉచితంగానే కొనసాగనున్నాయి. ఈ నిర్ణయం వెనుక ఉన్న అసలు కారణాన్ని ఎటర్నల్ వ్యవస్థాపకుడు దీపేందర్ గోయల్ వెల్లడించారు.
- బ్లింకిట్ అంబులెన్స్ సేవల్లో కొత్త నిబంధనలు..
- నాన్-ఎమర్జెన్సీ ప్రయాణాలకు రూ.2,500 ఫీజు..
- అత్యవసర సమయాల్లో మాత్రం ఉచిత సేవలు..
Blinkit Ambulance Service: అత్యవసర వైద్య పరిస్థితుల్లో అంబులెన్స్ అందుబాటులో లేకపోవడం వల్ల ఎంతోమంది ఇబ్బందులు ఎదుర్కొంటుంటారు. ముఖ్యంగా గోల్డెన్ అవర్‌లో ఆసుపత్రికి చేరుకోవడం చాలా కీలకం. ఇలాంటి పరిస్థితుల్లో వేగంగా వైద్య సహాయం అందించాలనే ఉద్దేశంతో ప్రముఖ క్విక్ కామర్స్ సంస్థ బ్లింకిట్ 10 నిమిషాల్లో అంబులెన్స్ సేవలను అందించే కార్యక్రమాన్ని ప్రారంభించింది. ఈ వినూత్న ప్రయత్నానికి మొదట్లో మంచి స్పందన లభించింది. అయితే తాజాగా ఈ సేవలకు సంబంధించి సంస్థ తీసుకున్న కొత్త నిర్ణయం ఆసక్తికర చర్చకు దారితీసింది.
బ్లింకిట్ మాతృసంస్థ ఎటర్నల్ వ్యవస్థాపకుడు దీపేందర్ గోయల్ వెల్లడించిన వివరాల ప్రకారం.. ఇకపై అత్యవసరం కాని అంబులెన్స్ ప్రయాణాలకు రూ.2,500 ఛార్జీ వసూలు చేయనున్నారు. అయితే నిజమైన మెడికల్ ఎమర్జెన్సీ పరిస్థితుల్లో అంబులెన్స్ అవసరమైన వారికి మాత్రం ఎలాంటి ఛార్జీలు లేకుండా ఉచిత సేవలు కొనసాగుతాయని స్పష్టం చేశారు.
అంబులెన్స్ సేవలకు ఛార్జీలు విధించడానికి కారణమేంటి?
బ్లింకిట్ ఈ నిర్ణయం తీసుకోవడం వెనుక ఓ ముఖ్యమైన కారణం ఉంది. గత రెండేళ్లలో సంస్థకు చెందిన అంబులెన్స్‌లు సుమారు 42 వేల కేసులను నిర్వహించాయని దీపేందర్ గోయల్ వెల్లడించారు. అయితే వీటిలో దాదాపు 20 వేల కేసులు మాత్రమే నిజమైన అత్యవసర వైద్య పరిస్థితులకు సంబంధించినవని తెలిపారు. మిగిలిన కేసుల్లో సాధారణ ఆసుపత్రి సందర్శనలు, రొటీన్ చెకప్‌లు, ఇతర అవసరాల కోసం అంబులెన్స్‌లను వినియోగించినట్లు పేర్కొన్నారు.
దీంతో అత్యవసర సమయాల్లో అంబులెన్స్‌లు అందుబాటులో ఉండాల్సిన అవసరాన్ని సంస్థ గుర్తించింది. సాధారణ ప్రయాణాల కోసం కూడా అంబులెన్స్‌లను ఉపయోగించడం వల్ల నిజంగా ప్రాణాపాయ పరిస్థితుల్లో ఉన్నవారికి సేవలు అందించడంలో ఆలస్యం జరిగే అవకాశం ఉందని భావిస్తోంది.
రూ.2,500 ఎక్కడికి వెళ్తాయంటే?
సాధారణ ప్రయాణాలకు విధించే రూ.2,500 ఛార్జీని ఎటర్నల్ ఫౌండేషన్ ట్రస్ట్‌కు మళ్లించనున్నట్లు సంస్థ తెలిపింది. ఈ నిధులను అంబులెన్స్ సేవలను మరింత విస్తరించడంతో పాటు పారామెడికల్ సిబ్బందికి అవసరమైన శిక్షణ అందించేందుకు వినియోగించనున్నారు. తద్వారా అత్యవసర సమయాల్లో మెరుగైన వైద్య సేవలు అందించడమే లక్ష్యంగా పెట్టుకున్నారు.
దేశవ్యాప్తంగా సేవల విస్తరణే లక్ష్యం!
రాబోయే రెండు నుంచి నాలుగేళ్లలో దేశంలోని ప్రధాన నగరాలకు బ్లింకిట్ అంబులెన్స్ సేవలను విస్తరించాలని సంస్థ ప్రణాళికలు సిద్ధం చేస్తోంది. ఇందుకోసం అంబులెన్స్‌ల సంఖ్యను పెంచడంతో పాటు శిక్షణ పొందిన సిబ్బందిని అందుబాటులోకి తీసుకురావాలని భావిస్తోంది.
మొత్తానికి బ్లింకిట్ తీసుకున్న ఈ నిర్ణయం వెనుక ప్రధాన ఉద్దేశం అత్యవసర సమయాల్లో అంబులెన్స్‌లు అందుబాటులో ఉండేలా చూడటమే. సాధారణ ప్రయాణాల కోసం అంబులెన్స్‌ల వినియోగాన్ని తగ్గించి, నిజంగా ప్రాణాపాయ పరిస్థితుల్లో ఉన్నవారికి సకాలంలో వైద్య సహాయం అందించడమే సంస్థ లక్ష్యంగా కనిపిస్తోంది.