పారిస్ ఒలింపిక్స్లో బరువు కారణంగా పతకం చేజార్చుకున్న వినేశ్ ఫొగాట్ ఘటనను భారత క్రీడాభిమానులు ఇంకా మర్చిపోలేదు. ఇప్పుడు భారత మిక్స్డ్ మార్షల్ ఆర్ట్స్ (MMA) ఫైటర్ సుచిక తరియాల్కు కూడా బరువు తేడా ప్రతికూలంగా మారింది. ఆసియా క్రీడల సెమీఫైనల్లో ప్రత్యర్థితో హోరాహోరీగా పోరాడిన ఆమె.. చివరకు ఆటేతర కారణంతో ఫైనల్కు దూరమై కాంస్య పతకంతో సరిపెట్టుకుంది.
టైగా ముగిసిన సెమీఫైనల్
నగోయాలో సోమవారం జరిగిన మహిళల 60 కేజీల విభాగం సెమీఫైనల్లో సుచిక తరియాల్, సింగపూర్కు చెందిన హుయ్ హూన్ టియో తలపడ్డారు. ఇద్దరూ నువ్వా నేనా అన్నట్లుగా పోరాడటంతో రెండు రౌండ్లు ముగిసేసరికి స్కోర్లు సమంగా నిలిచాయి.
ముగ్గురు జడ్జిల్లో ఒకరు 19-19గా స్కోర్ చేయగా.. మిగిలిన ఇద్దరు 19-20, 20-19గా మార్కులు ఇవ్వడంతో స్పష్టమైన విజేత తేలలేదు. దీంతో టైబ్రేకర్కు వెళ్లారు. అక్కడ ఇద్దరు జడ్జిలు టియోకు అనుకూలంగా స్కోర్ చేయడంతో ఆమెను విజేతగా ప్రకటించారు.
భారత బృందం ఈ నిర్ణయంపై అభ్యంతరం వ్యక్తం చేయడంతో మరో ముగ్గురు జడ్జిలు పోరును పరిశీలించారు. అయినప్పటికీ స్కోర్లు సమంగా ఉండటంతో అంతర్జాతీయ MMA నిబంధనల ప్రకారం బరువు తక్కువగా ఉన్న క్రీడాకారిణి టియోను విజేతగా ప్రకటించారు.
700 గ్రాముల తేడానే శాపంగా మారింది
మ్యాచ్కు ముందు నిర్వహించిన బరువు పరీక్షలో సుచిక 59.2 కిలోలు ఉండగా.. టియో 58.5 కిలోల బరువుతో ఉంది. అంటే సింగపూర్ క్రీడాకారిణి కంటే సుచిక 700 గ్రాములు ఎక్కువగా ఉంది.
పోటీ 60 కేజీల విభాగంలోనే జరిగినప్పటికీ, స్కోర్లు సమమైన సందర్భంలో బరువు తక్కువగా ఉన్న క్రీడాకారిణికి నిబంధనల ప్రకారం ప్రయోజనం లభించింది. దీంతో అద్భుతంగా పోరాడిన సుచిక ఫైనల్ బెర్త్ను కోల్పోయింది.
కన్నీటిపర్యంతమైన సుచిక
టియోను విజేతగా ప్రకటించగానే సుచిక తీవ్ర భావోద్వేగానికి గురైంది. తాను పోరులో గెలిచాననే నమ్మకంతో ఉన్నానని, అందుకే ఈ ఫలితాన్ని అంగీకరించడం చాలా కష్టంగా అనిపించిందని ఆమె చెప్పింది.
రెండు రౌండ్లలోనూ తాను ప్రత్యర్థిపై పైచేయి సాధించానని సుచిక పేర్కొంది. టియో నుంచి కొన్ని బలమైన పంచ్లు వచ్చిన మాట వాస్తవమేనని, అయితే తాను కూడా సమర్థంగా బదులిచ్చానని తెలిపింది. చివరి నిమిషంలో ప్రత్యర్థి రక్షణాత్మకంగా ఆడితే.. తాను మాత్రం మరింత దూకుడుగా పోరాడినట్లు చెప్పింది.
చరిత్ర సృష్టించిన సుచిక
ఫైనల్కు చేరలేకపోయినా సుచిక తరియాల్ సాధించిన కాంస్య పతకం భారత MMA చరిత్రలో ప్రత్యేకంగా నిలిచిపోనుంది. ఆసియా క్రీడల్లో MMAకు ఈ ఏడాదే తొలిసారి చోటు లభించింది.
దీంతో ఆసియా క్రీడల చరిత్రలో భారతదేశానికి తొలి MMA పతకం అందించిన క్రీడాకారిణిగా సుచిక తరియాల్ రికార్డుల్లో నిలిచింది. పతకం కాంస్యమే అయినా.. కొత్త క్రీడలో భారత్కు తొలి పతకం అందించడం ఆమె కెరీర్లోనే కాకుండా భారత MMA చరిత్రలోనూ ఒక ముఖ్యమైన ఘట్టంగా మారింది.