D-News: భారత్‌లో సెమీకండక్టర్‌ రంగాన్ని ప్రపంచ స్థాయికి తీసుకెళ్లేందుకు కేంద్ర ప్రభుత్వం సెమికాన్‌ 2.0పై ప్రత్యేక దృష్టి పెట్టింది. ఈ కార్యక్రమం ద్వారా మరో లక్ష మంది సెమీకండక్టర్‌ ఇంజినీర్లను తయారు చేయాలని లక్ష్యంగా పెట్టుకున్నట్లు కేంద్ర ఎలక్ట్రానిక్స్‌, ఐటీ శాఖ మంత్రి అశ్విని వైష్ణవ్‌ తెలిపారు.
సెమికాన్‌ 2.0లో చిప్‌ తయారీతో పాటు డిజైన్‌, పరికరాలు, ముడి పదార్థాలు, అడ్వాన్స్‌డ్‌ ప్యాకేజింగ్‌, పరిశోధన, అభివృద్ధి, నైపుణ్యాల పెంపు వంటి రంగాలపై సమగ్రంగా దృష్టి సారించనున్నట్లు మంత్రి వివరించారు. సెమీకండక్టర్‌ రంగానికి అవసరమైన పూర్తి వ్యవస్థను దేశంలోనే అభివృద్ధి చేయడమే లక్ష్యమని చెప్పారు.
నాలుగేళ్లలో 85 వేల మంది ఇంజినీర్లు
భారత్‌ ఇప్పటికే నాలుగేళ్లలో 85 వేల మంది సెమీకండక్టర్‌ ఇంజినీర్లను అభివృద్ధి చేసిందని వైష్ణవ్‌ వెల్లడించారు. వాస్తవానికి ఈ లక్ష్యాన్ని పదేళ్లలో సాధించాలని నిర్ణయించినప్పటికీ, నాలుగేళ్లలోనే పూర్తి చేసినట్లు తెలిపారు.
ప్రపంచ సెమీకండక్టర్‌ పరిశ్రమలో 2032 నాటికి దాదాపు 10 లక్షల మంది ఉద్యోగుల కొరత ఏర్పడే అవకాశం ఉందని మంత్రి పేర్కొన్నారు. ఈ నేపథ్యంలో భారత్‌లో పెద్ద సంఖ్యలో నైపుణ్యం కలిగిన ఇంజినీర్లను తయారు చేయడం కీలకమని చెప్పారు.
విద్యార్థుల నుంచి 255 చిప్‌ డిజైన్లు
దేశవ్యాప్తంగా 355 విశ్వవిద్యాలయాల్లో సెమీకండక్టర్‌ డిజైన్‌ కార్యక్రమాలను విస్తరించినట్లు వైష్ణవ్‌ తెలిపారు. టైర్‌-2, టైర్‌-3 నగరాల్లోని విద్యార్థులకు కూడా ఈ అవకాశాలను అందుబాటులోకి తీసుకొచ్చామని చెప్పారు. ఇప్పటివరకు విద్యార్థులు 255 చిప్‌లను డిజైన్‌ చేసినట్లు వెల్లడించారు.
సెమికాన్‌ 2.0లో కంప్యూట్‌, మెమరీ, రేడియో ఫ్రీక్వెన్సీ, పవర్‌, నెట్‌వర్కింగ్‌, సెన్సార్లు వంటి ఆరు కీలక విభాగాలకు ప్రాధాన్యం ఇవ్వనున్నారు. వివిధ రంగాల అవసరాలను తీర్చేందుకు సుమారు 100 చిప్‌ల అభివృద్ధిని లక్ష్యంగా పెట్టుకున్నారు.
తయారీ ప్రాజెక్టులకు వేగం
సెమీకండక్టర్‌ తయారీకి సంబంధించి ఇప్పటికే ఆరు రాష్ట్రాల్లో 12 ప్రాజెక్టులకు కేంద్రం ఆమోదం తెలిపింది. సిలికాన్‌ ఫ్యాబ్‌, కాంపౌండ్‌ సెమీకండక్టర్‌, డిస్‌ప్లే తయారీ, ATMP/OSAT ప్యాకేజింగ్‌ వంటి ప్రాజెక్టులు ఇందులో ఉన్నాయి.
వీటిలో మూడు ప్రాజెక్టులు 2026లో వాణిజ్య ఉత్పత్తిని ప్రారంభించగా, మరో రెండు ప్రాజెక్టులు ఈ ఏడాదిలోనే ఉత్పత్తి ప్రారంభించే అవకాశం ఉందని మంత్రి తెలిపారు.
గ్లోబల్‌ సరఫరా గొలుసులో కీలకంగా భారత్‌
అమెరికా, చైనా, జపాన్‌, దక్షిణ కొరియా, యూరోపియన్‌ యూనియన్‌ వంటి దేశాలు సెమీకండక్టర్‌ రంగంలో భారీగా పెట్టుబడులు పెడుతున్న నేపథ్యంలో భారత్‌ కూడా పూర్తి స్థాయి సామర్థ్యాలను అభివృద్ధి చేసుకోవాల్సిన అవసరం ఉందని వైష్ణవ్‌ అన్నారు.
చిప్‌ డిజైన్‌ నుంచి తయారీ, ప్యాకేజింగ్‌ వరకు మొత్తం విలువ గొలుసును భారత్‌లోనే బలోపేతం చేయడం ద్వారా ప్రపంచ సెమీకండక్టర్‌ సరఫరా వ్యవస్థలో దేశం కీలక పాత్ర పోషించేలా చర్యలు తీసుకుంటున్నామని తెలిపారు. పెట్టుబడుల ప్రకటనలకే పరిమితం కాకుండా ప్రాజెక్టుల వాస్తవ అమలు, ఉత్పత్తి, ఫలితాలపైనే ప్రభుత్వం ప్రధానంగా దృష్టి పెడుతుందని స్పష్టం చేశారు.