D Spiritual: Sept 7: పాలకొల్లు మావుళ్లమ్మ పేట రెల్లి వీధిలో పర్యావరణ పరిరక్షణ లక్ష్యంగా నిర్మిస్తున్న 65 అడుగుల భారీ మట్టి గణపతి విగ్రహం భక్తులకు కనువిందు చేయడానికి సిద్ధమవుతోంది. వినాయక చవితి పర్వదినాన్ని పురస్కరించుకుని ఏర్పాటు చేస్తున్న ఈ విగ్రహం ఉమ్మడి పశ్చిమ గోదావరి జిల్లాలోనే ప్రత్యేక ఆకర్షణగా నిలవనుంది.
ప్లాస్టర్ ఆఫ్ పారిస్ (పీఓపీ), రసాయన రంగులకు పూర్తిగా దూరంగా.. కేవలం మట్టితోనే ఈ భారీ విగ్రహాన్ని రూపొందించడం ప్రత్యేకతగా చెప్పుకోవచ్చు. ప్రముఖ శిల్పి ఇంటి ప్రసాద్ నేతృత్వంలో పలువురు కళాకారులు ఎంతో శ్రమించి ఈ మహోన్నత గణపతి రూపాన్ని తీర్చిదిద్దారు.
ఈ నెల 14 నుంచి లంబోదరుడిని భక్తుల దర్శనానికి అందుబాటులో ఉంచనున్నారు. పాలకొల్లు పట్టణంతో పాటు చుట్టుపక్కల ప్రాంతాల నుంచి పెద్ద సంఖ్యలో భక్తులు తరలివచ్చి ప్రత్యేక పూజలు నిర్వహించనున్నారు.
38 ఏళ్ల ప్రస్థానం.. ఈసారి మరింత ప్రత్యేకం
రెల్లి సంఘం ఆధ్వర్యంలో 1988 నుంచి ప్రతి ఏటా గణపతి నవరాత్రోత్సవాలను అత్యంత వైభవంగా నిర్వహిస్తూ వస్తున్నారు. ఈ ఏడాది 38వ వార్షికోత్సవం కావడంతో ఉత్సవాలను మరింత ఘనంగా నిర్వహించాలని నిర్వాహకులు నిర్ణయించారు.
గతేడాది వరకు 60 అడుగుల ఎత్తు వరకు గణపతి విగ్రహాలను ఏర్పాటు చేయగా.. ఈసారి రికార్డు స్థాయిలో 65 అడుగుల ఎత్తుతో భారీ విగ్రహాన్ని రూపొందించారు. నవరాత్రి ఉత్సవాలు పూర్తయిన అనంతరం పర్యావరణానికి ఎలాంటి హాని కలగకుండా అదే ప్రాంగణంలో శాస్త్రోక్తంగా నిమజ్జనం చేసేందుకు నిర్వాహకులు ఏర్పాట్లు పూర్తి చేశారు.
భక్తుల కోసం అన్ని ఏర్పాట్లు
ప్రస్తుతం విగ్రహ నిర్మాణ పనులు పూర్తయ్యాయి. తుది మెరుగులు దిద్దే క్రమంలో రంగులు అద్దే కార్యక్రమం వేగంగా కొనసాగుతోంది. భక్తులకు ఎలాంటి అసౌకర్యం కలగకుండా నిర్వాహకులు అవసరమైన అన్ని వసతులను ఏర్పాటు చేస్తున్నారు.
వినాయక చవితి రోజు నుంచి తొమ్మిది రోజుల పాటు ప్రత్యేక పూజలు, ఆధ్యాత్మిక కార్యక్రమాలు నిర్వహించనున్నారు. స్థానికులతో పాటు వివిధ ప్రాంతాల నుంచి వచ్చే భక్తులతో రెల్లి వీధి పరిసరాలు సందడిగా మారనున్నాయి.