D Spiritual: Nov 19: విద్యుత్ కాంతుల్లో యాదగిరిగుట్ట దివ్యక్షేత్రం.. కార్తీకోత్సవాలకు ఘనంగా ఏర్పాట్లు!

యాదగిరిగుట్ట దివ్యక్షేత్రం కార్తీక మాస పవిత్రత, ఆధ్యాత్మిక వైభవాన్ని దేశవ్యాప్తంగా చాటేందుకు సిద్ధమైంది. విద్యుత్ కాంతుల అలంకరణతో రాత్రివేళ ఆలయ పరిసరాలు భూతల స్వర్గాన్ని తలపిస్తున్నాయి. కార్తీక మాసంలో ఆధ్యాత్మిక కార్యక్రమాలతో పాటు భక్తులకు మెరుగైన దర్శన సౌకర్యాలు, మౌలిక వసతులు కల్పించడమే లక్ష్యంగా జిల్లా యంత్రాంగం, దేవస్థానం అధికారులు సమన్వయంతో ఏర్పాట్లు చేస్తున్నారు. నాలుగు రోజుల పాటు నిర్వహించనున్న ఈ వేడుకలు యాదగిరిగుట్ట క్షేత్ర ఆధ్యాత్మిక ప్రాశస్త్యాన్ని మరింతగా చాటనున్నాయి.

కోటి పుష్పార్చనతో కార్తీకోత్సవాలకు శ్రీకారం!

యాదగిరిగుట్ట ప్రధానాలయంలో గురువారం కోటి పుష్పార్చనతో కార్తీక మాసోత్సవాలు శాస్త్రోక్తంగా ప్రారంభమయ్యాయి. ఉత్సవాల్లో భాగంగా సాయంత్రం 6 గంటలకు మాడ్గుల నాగఫణిశర్మ ఆధ్యాత్మిక ప్రవచనం నిర్వహించనుండగా, జానపద గాయని తేలు విజయ భక్తి గీతాలను ఆలపించనున్నారు. ఈ నెల 21న ప్రముఖ సినీ సంగీత దర్శకుడు ఆర్పీ పట్నాయక్ బృందం ఆధ్వర్యంలో సంగీత విభావరి, శాస్త్రీయ నృత్య ప్రదర్శనలు ఏర్పాటు చేశారు.

ఉత్సవాల చివరి రోజున రుద్రాక్ష ఫౌండేషన్ ఆధ్వర్యంలో ఒడిస్సీ నృత్య ప్రదర్శన, అభినేత్రి బృందం నృత్యరూపకం, కళాకృష్ణ బృందం పేరిణి నృత్య ప్రదర్శనలు భక్తులను అలరించనున్నాయి. వీటితో పాటు స్వామివారికి ప్రత్యేక పూజలు నిర్వహించనున్నారు. ధార్మిక ప్రవచనాలు, భక్తి సంగీత విభావరి, శాస్త్రీయ, సంప్రదాయ నృత్య ప్రదర్శనలతో యాదగిరిగుట్ట ఆధ్యాత్మిక సందడిని సంతరించుకోనుంది.

ఉత్సవాలకు భక్తులతో పాటు ప్రజాప్రతినిధులు, ప్రముఖులు పెద్ద సంఖ్యలో హాజరయ్యే అవకాశం ఉండటంతో ఎలాంటి ఇబ్బందులు తలెత్తకుండా అధికారులు ముందస్తు చర్యలు చేపట్టారు. ఈ మేరకు కలెక్టర్, దేవస్థానం ఈవో సమీక్ష నిర్వహించి అన్ని శాఖల అధికారులు సమన్వయంతో పనిచేయాలని ఆదేశించారు.

వ్రతాలకు ఆరు విడతల్లో అవకాశం!

కార్తీక మాసంలో యాదగిరిగుట్టకు సత్యనారాయణ స్వామి వ్రతాలు ఆచరించేందుకు భక్తులు పెద్ద సంఖ్యలో తరలివస్తుండటంతో వ్రత మండపంలో ప్రత్యేక ఏర్పాట్లు చేశారు. ప్రతిరోజూ ఉదయం 7 గంటల నుంచి సాయంత్రం 6 గంటల వరకు ఆరు విడతల్లో వ్రతాలు నిర్వహించనున్నారు. అయితే కార్తీక పౌర్ణమి రోజున భక్తుల రద్దీని దృష్టిలో ఉంచుకుని ఎనిమిది విడతల్లో వ్రతాలు నిర్వహించేలా ఏర్పాట్లు చేశారు. ప్రతి విడత మధ్య గంట విరామం ఉండేలా ప్రత్యేక షెడ్యూల్ రూపొందించారు. భక్తులకు ఎలాంటి అసౌకర్యం కలగకుండా ఈవో భవానీశంకర్ ఎప్పటికప్పుడు క్షేత్రస్థాయిలో ఏర్పాట్లను పరిశీలిస్తున్నారు.

పాతగుట్టలో నాలుగు విడతల్లో వ్రతాలు!

యాదగిరిగుట్ట అనుబంధ ఆలయమైన పాతగుట్ట దేవస్థానంలోనూ కార్తీక మాస వ్రతాల నిర్వహణకు ప్రత్యేక ఏర్పాట్లు చేశారు. ఇక్కడ ప్రతిరోజూ ఉదయం 9 గంటల నుంచి సాయంత్రం 4 గంటల వరకు నాలుగు విడతల్లో సత్యనారాయణ స్వామి వ్రతాలు నిర్వహించనున్నారు. కార్తీక పౌర్ణమి రోజున భక్తుల రద్దీ ఎక్కువగా ఉండే అవకాశం ఉన్నందున ఆ రోజు ఆరు విడతల్లో వ్రతాలు నిర్వహించాలని నిర్ణయించారు. భక్తులకు దర్శనం, వ్రతాల నిర్వహణలో ఎలాంటి ఇబ్బందులు కలగకుండా ఆలయ అధికారులు ప్రత్యేక పర్యవేక్షణ చేపట్టారు.

పోలీసు శాఖ ఆధ్వర్యంలో పటిష్ట భద్రత!

కార్తీకోత్సవాల సందర్భంగా భక్తుల రద్దీని దృష్టిలో ఉంచుకుని పోలీసు శాఖ ఆధ్వర్యంలో పటిష్ట భద్రతా ఏర్పాట్లు చేస్తున్నారు. ట్రాఫిక్ నియంత్రణ, వాహనాల పార్కింగ్ కోసం ప్రత్యేక చర్యలు చేపట్టారు. భక్తుల ఆరోగ్య అవసరాల కోసం వైద్య శిబిరాలు ఏర్పాటు చేయాలని నిర్ణయించారు. అలాగే రద్దీకి అనుగుణంగా ఆర్టీసీ ప్రత్యేక బస్సులు నడపాలని, నిరంతర విద్యుత్ సరఫరా, తాగునీటి వసతి కల్పించాలని కలెక్టర్ సంబంధిత శాఖల అధికారులను ఆదేశించారు.

ఆలయ పరిసరాల్లో పారిశుద్ధ్య నిర్వహణకు ప్రత్యేక ప్రాధాన్యత ఇవ్వాలని మునిసిపల్ అధికారులకు సూచించారు. భక్తులకు ఎలాంటి అసౌకర్యాలు కలగకుండా అన్ని శాఖలు సమన్వయంతో పనిచేయాలని స్పష్టం చేశారు. మొత్తంగా కార్తీక మాసోత్సవాలను వైభవంగా నిర్వహించేందుకు యాదగిరిగుట్టలో ఆధ్యాత్మిక, సాంస్కృతిక కార్యక్రమాలతో పాటు భక్తుల సౌకర్యార్థం విస్తృత ఏర్పాట్లు కొనసాగుతున్నాయి.

Leave a Reply

Your email address will not be published. Required fields are marked *