India vs New Zealand: టీమిండియా స్టార్ ఆటగాడు రోహిత్ శర్మ నాలుగో వన్డేలో తన ఫీల్డింగ్‌తో అభిమానులను ఆశ్చర్యపరిచాడు. మొదట సులభమైన క్యాచ్‌ను జారవిడిచి నిరాశపరిచిన హిట్‌మ్యాన్.. ఆ తర్వాత అద్భుతమైన డైవింగ్ క్యాచ్ పట్టి అందరినీ ఆకట్టుకున్నాడు.
న్యూజిలాండ్‌తో మౌంట్ మాంగనుయ్‌లోని బే ఓవల్ వేదికగా జరిగిన నాలుగో వన్డేలో ఈ ఘటన చోటుచేసుకుంది. న్యూజిలాండ్ ఇన్నింగ్స్ రెండో ఓవర్‌లో భారత బౌలర్ ఔకిబ్ నబీ బౌలింగ్‌లో విల్ యంగ్ ఇచ్చిన క్యాచ్‌ను ఫస్ట్ స్లిప్‌లో ఉన్న రోహిత్ శర్మ అందుకోలేకపోయాడు. ఆ తర్వాతి బంతికే వికెట్ కీపర్ ఇషాన్ కిషన్ కూడా మరో క్యాచ్‌ను వదిలేయడంతో యంగ్‌కు రెండు లైఫ్‌లు లభించాయి.
అయితే, ఆ తప్పిదం తర్వాత రోహిత్ తన అద్భుతమైన ఫీల్డింగ్‌తో తిరిగి వార్తల్లో నిలిచాడు. న్యూజిలాండ్ బ్యాటర్ ఫిన్ అలెన్ 41 పరుగుల వద్ద ఉన్నప్పుడు అక్షర్ పటేల్ బౌలింగ్‌లో షాట్ ఆడాడు. బంతి షార్ట్ కవర్‌లో ఫీల్డింగ్ చేస్తున్న రోహిత్ వైపు వెళ్లింది. వెంటనే స్పందించిన హిట్‌మ్యాన్ కుడివైపునకు డైవ్ చేస్తూ రెండు చేతులతో అద్భుతంగా క్యాచ్ అందుకున్నాడు.
దీంతో ప్రమాదకరంగా మారుతున్న ఫిన్ అలెన్ ఇన్నింగ్స్‌కు తెరపడింది. అలెన్ 30 బంతుల్లో 41 పరుగులు చేసి పెవిలియన్ చేరాడు. ఈ క్యాచ్‌తో రోహిత్ తనపై వచ్చిన విమర్శలకు మైదానంలోనే సమాధానం ఇచ్చినట్లయింది.
మొదట క్యాచ్ వదిలేసినా.. ఆ తర్వాత కళ్లు చెదిరే క్యాచ్‌తో మ్యాచ్‌లో ప్రత్యేక ఆకర్షణగా నిలిచాడు రోహిత్ శర్మ. ప్రస్తుతం ఈ హిట్‌మ్యాన్ ఫీల్డింగ్‌కు సంబంధించిన వీడియో సోషల్ మీడియాలో క్రికెట్ అభిమానుల దృష్టిని ఆకర్షిస్తోంది.