D Spiritual: Nov 9: కరీంనగర్‌లో వింత ఆచారం.. స్మశాన వాటికలో దీపావళి వేడుకలు!
కరీంనగర్: దీపావళి అంటే సాధారణంగా ప్రతి ఒక్కరికీ ఇళ్లలో దీపాలు వెలిగించడం, బాణసంచా కాల్చడం, కుటుంబ సభ్యులతో కలిసి ఆనందంగా పండుగ జరుపుకోవడం గుర్తుకు వస్తుంది. అయితే కరీంనగర్‌లోని కార్ఖానా గడ్డలో మాత్రం దీపావళి వేడుకలు వినూత్నంగా, సంప్రదాయబద్ధంగా జరుగుతాయి. ఇక్కడ ప్రజలు తమ పూర్వీకులను స్మరించుకుంటూ స్మశాన వాటికల్లోని సమాధుల వద్దే దీపావళి పండుగను జరుపుకుంటారు. తరతరాలుగా కొనసాగుతున్న ఈ అరుదైన ఆచారం అందరినీ ఆశ్చర్యానికి గురిచేస్తోంది.
కరీంనగర్ జిల్లా కేంద్రంలోని కార్ఖానా గడ్డ ప్రాంతంలో రెండు పెద్ద స్మశాన వాటికలు ఉన్నాయి. కిసాన్ నగర్, పసుల నారాయణ కాలనీ తదితర ప్రాంతాలకు చెందిన వారు మరణించిన తమ కుటుంబ సభ్యులకు ఇక్కడ అంత్యక్రియలు నిర్వహిస్తుంటారు. సాధారణంగా దసరాకు ముందు వచ్చే పితృ అమావాస్య సందర్భంగా పెద్దలకు బియ్యం సమర్పించడం ఆనవాయితీగా ఉంటుంది. అయితే ఇక్కడి ప్రజలు మాత్రం దీపావళి పర్వదినాన్ని తమ పూర్వీకులను స్మరించుకునే ప్రత్యేక సందర్భంగా భావిస్తారు.
దీపావళి పండుగకు ముందుగానే కుటుంబ సభ్యులు తమ పెద్దల సమాధులను శుభ్రం చేసి, రంగులు వేసి అందంగా అలంకరిస్తారు. పండుగ రోజున సాయంత్రం కుటుంబ సభ్యులందరూ స్మశాన వాటికకు చేరుకుని తమ పూర్వీకులను స్మరించుకుంటూ సమాధుల వద్ద దీపాలు వెలిగిస్తారు. అనంతరం పెద్దలకు ఇష్టమైన ఆహార పదార్థాలను సమాధుల వద్ద ఉంచి నివాళులర్పిస్తారు. కుటుంబమంతా కలిసి అక్కడే దీపావళి వేడుకలు నిర్వహించుకుంటారు.
ఈ వేడుకల్లో భాగంగా సమాధుల వద్దే బాణసంచా కాలుస్తూ, టపాసులు పేలుస్తూ ఆనందంగా గడుపుతారు. కనీసం మూడు నుంచి నాలుగు గంటల పాటు కుటుంబ సభ్యులంతా అక్కడే ఉంటారు. తమకు దూరమైన పెద్దలను గుర్తు చేసుకుంటూ కొద్దిసేపు మౌనం పాటించి నివాళులర్పిస్తారు. సాధారణంగా ఇళ్లలో నిర్వహించుకునే దీపావళి సంబరాలను ఇక్కడ మాత్రం తమ పూర్వీకుల సమాధుల వద్దే జరుపుకోవడం ఈ ప్రాంత ప్రత్యేకతగా నిలుస్తోంది.
ఏళ్ల తరబడి కొనసాగుతున్న ఈ సంప్రదాయం కారణంగా దీపావళి రోజున కార్ఖానా గడ్డలోని స్మశాన వాటికలు దీపాల కాంతులతో వెలిగిపోతాయి. సమాధులన్నీ దీపాలతో ప్రకాశించడంతో పాటు బాణసంచా, క్రాకర్లు, చిచ్చుబుడ్డుల వెలుగులతో ఆ ప్రాంతమంతా పండుగ శోభను సంతరించుకుంటుంది. చిన్నా పెద్దా అనే తేడా లేకుండా కుటుంబ సభ్యులంతా తమ పూర్వీకుల సమాధుల వద్ద దీపాలు వెలిగించి వేడుకల్లో పాల్గొంటారు.
దేశంలోని చాలా ప్రాంతాల్లో దీపావళి వేడుకలు ఇళ్లలో, ఆలయాల్లో నిర్వహించుకోవడం సాధారణం. కానీ కరీంనగర్‌లోని కార్ఖానా గడ్డలో మాత్రం తమకు దూరమైన పెద్దలను మరచిపోకుండా, వారిని కూడా పండుగలో భాగస్వాములుగా భావిస్తూ ఈ వేడుకలు నిర్వహించుకోవడం విశేషం. దీపావళి సందర్భంగా పెద్ద సంఖ్యలో స్థానికులు స్మశాన వాటికలకు చేరుకుని తమ పూర్వీకులకు నివాళులర్పిస్తారు. తమ పెద్దలను స్మరించుకుంటూ వారి సమాధుల వద్ద దీపాలు వెలిగించి, బాణసంచా కాల్చి దీపావళి జరుపుకుంటామని స్థానికులు చెబుతున్నారు. పూర్వీకులపై ప్రేమాభిమానాలను చాటిచెప్పే ఈ అరుదైన సంప్రదాయం కరీంనగర్‌కు ప్రత్యేక గుర్తింపుగా నిలుస్తోంది.