హైదరాబాద్‌లో చోటుచేసుకున్న విషాదకర రోడ్డు ప్రమాదం ప్రతి ఒక్కరినీ కంటతడి పెట్టిస్తోంది. అప్పటివరకు కుటుంబ సభ్యులతో ఆనందంగా గడిపిన 13 ఏళ్ల బాలిక ప్రమాదంలో ప్రాణాలు కోల్పోయింది. అయితే, తమ బిడ్డను కోల్పోయిన బాధలోనూ ఆమె తల్లిదండ్రులు తీసుకున్న గొప్ప నిర్ణయం ఆరుగురికి ప్రాణదానం చేసింది. చిన్నారి అవయవదానంతో పలువురి జీవితాల్లో వెలుగులు నింపింది. ఈ హృదయవిదారక ఘటన వివరాల్లోకి వెళ్తే..
హైదరాబాద్‌లోని కూకట్‌పల్లి ప్రాంతానికి చెందిన 13 ఏళ్ల గుడ రోహిత స్థానిక ప్రభుత్వ పాఠశాలలో తొమ్మిదో తరగతి చదువుతోంది. ఇటీవల కుటుంబ సభ్యులతో కలిసి దేవాలయానికి వెళ్లిన ఆమె, తిరిగి ఆటోలో ఇంటికి వస్తుండగా ఊహించని ప్రమాదం జరిగింది. బాలానగర్ ఫ్లైఓవర్ సమీపంలో వేగంగా వచ్చిన ఓ లారీ వారి ఆటోను వెనుక నుంచి బలంగా ఢీకొట్టింది. ఈ ప్రమాదంలో రోహిత తీవ్రంగా గాయపడింది.
వెంటనే కుటుంబ సభ్యులు చిన్నారిని నగరంలోని ఓ ప్రైవేట్ ఆసుపత్రికి తరలించారు. వైద్యులు మెరుగైన చికిత్స అందించేందుకు తీవ్రంగా ప్రయత్నించినప్పటికీ ఫలితం లేకపోయింది. తీవ్ర గాయాల కారణంగా అక్టోబర్ 30న రోహిత బ్రెయిన్ డెడ్ అయినట్లు వైద్యులు నిర్ధారించారు. దీంతో ఆ కుటుంబంలో తీరని విషాదం నెలకొంది.
కంటికి రెప్పలా పెంచుకున్న కుమార్తె ఇక తిరిగి రాదనే వార్త తల్లిదండ్రులను తీవ్రంగా కలచివేసింది. అయినప్పటికీ, ఆ విషాద సమయంలోనూ రోహిత తండ్రి నారాయణరావు, కుటుంబ సభ్యులు మానవత్వంతో కూడిన గొప్ప నిర్ణయం తీసుకున్నారు. తమ కుమార్తె భౌతికంగా తమ మధ్య లేకపోయినా, ఆమె అవయవాల ద్వారా మరికొందరు ప్రాణాలతో జీవించవచ్చని భావించారు.
ఈ క్రమంలో తెలంగాణ ప్రభుత్వ జీవన్‌దాన్ అవయవదాన కార్యక్రమం ద్వారా రోహిత అవయవాలను దానం చేసేందుకు అంగీకరించారు. చిన్నారి కిడ్నీలు, కాలేయంలోని భాగాలు, రెండు కార్నియాలను దానం చేశారు. ఈ అవయవాల ద్వారా ఆరుగురికి కొత్త జీవితాన్ని అందించే అవకాశం కలిగింది.
తమ బిడ్డను కోల్పోయిన బాధను దిగమింగుకుని, ఇతర కుటుంబాల్లో ఆనందం నింపాలనే తల్లిదండ్రుల నిర్ణయం అందరికీ ఆదర్శంగా నిలుస్తోంది. చిన్నారి రోహిత ఇక మన మధ్య లేకపోయినా, ఆమె అవయవాల రూపంలో ఆరుగురి జీవితాల్లో చిరస్థాయిగా నిలిచిపోనుంది. ఈ ఘటన అవయవదానం ప్రాముఖ్యతను మరోసారి చాటిచెప్పింది.