శబరిమల అయ్యప్ప స్వామి దర్శనానికి వెళ్లే తెలంగాణ భక్తులకు టీజీఎస్ఆర్టీసీ శుభవార్త అందించింది. మండల పూజ, మకరవిళక్కు ఉత్సవాలను దృష్టిలో పెట్టుకుని ప్రత్యేక బస్సులను నడపాలని నిర్ణయించింది. భక్తుల ప్రయాణాన్ని సౌకర్యవంతంగా మార్చడంతో పాటు బస్సుల బుకింగ్‌పై గురుస్వాములకు ప్రత్యేక రాయితీలు, ప్రోత్సాహకాలను ప్రకటించింది.
టీజీఎస్ఆర్టీసీ అధికారుల వివరాల ప్రకారం, నవంబర్ 16 నుంచి డిసెంబర్ 27 వరకు మండల పూజకు వెళ్లే అయ్యప్ప భక్తుల కోసం ప్రత్యేక బస్సులు అందుబాటులో ఉంటాయి. అలాగే డిసెంబర్ 30 నుంచి జనవరి 20 వరకు నూతన సంవత్సరం, మకరవిళక్కు ఉత్సవాల సందర్భంగా కూడా ప్రత్యేక సర్వీసులు నడపనున్నారు.
గురుస్వాములకు ప్రత్యేక ప్రయోజనాలు
ప్రత్యేక బస్సులను బుక్ చేసే గురుస్వాములకు ఆర్టీసీ ఉచిత ప్రయాణ సౌకర్యం కల్పించనుంది. ఒకటి కంటే ఎక్కువ బస్సులను బుక్ చేసిన గురుస్వామికి ఒక బస్సులో ఉచిత ప్రయాణం కల్పిస్తారు. మిగిలిన బస్సుల బుకింగ్‌పై రోజుకు రూ.350 చొప్పున కమిషన్ చెల్లించనున్నారు.
వంటవారికి, మణికంఠలకు ఉచిత ప్రయాణం
ప్రతి బస్సులో ఇద్దరు వంటవారికి, పదేళ్లలోపు ఇద్దరు మణికంఠలకు, ఒక లగేజీ అటెండెంట్‌కు ఉచిత ప్రయాణ సౌకర్యం కల్పించనున్నారు. వీరికి బస్సులో ప్రత్యేకంగా సీట్లు కేటాయించకుండా ప్రయాణానికి అనుమతిస్తారు. దీంతో అయ్యప్ప భక్తుల బృందాలకు ప్రయాణ ఖర్చులు కొంతమేర తగ్గనున్నాయి.
కేరళ ప్రభుత్వం నుంచి మరో ఊరట
శబరిమలకు రాకపోకలు సాగించే టీజీఎస్ఆర్టీసీ కాంట్రాక్ట్ క్యారేజ్ బస్సులకు కేరళ ప్రభుత్వం బోర్డర్ ట్యాక్స్ నుంచి మినహాయింపు ఇచ్చింది. ఈ నిర్ణయం వల్ల బస్సుల నిర్వహణ ఖర్చు తగ్గే అవకాశం ఉంది. తద్వారా భక్తులపై అదనపు ఆర్థిక భారం పడకుండా ప్రయోజనం కలగనుంది.
ప్రత్యేక బస్సుల బుకింగ్, ఇతర వివరాల కోసం భక్తులు టీజీఎస్ఆర్టీసీ అధికారులను సంప్రదించవచ్చు. ఇందుకోసం 040-66440000, 040-23450033 నంబర్లను అందుబాటులో ఉంచారు. అయ్యప్ప భక్తులు ముందుగానే బస్సులను బుక్ చేసుకుని తమ యాత్రకు ఏర్పాట్లు చేసుకోవాలని అధికారులు సూచిస్తున్నారు.