D News: Nov 4: ‘దేవాలయాల్లో అత్యాచారాలు జరుగుతున్నాయి’ అంటూ వ్యాఖ్యలు చేసిన ఆల్ ఇండియా స్టూడెంట్స్ అసోసియేషన్ (AISA) సభ్యురాలు నేహా బోరాపై ఢిల్లీలో పోలీసులకు ఫిర్యాదు అందింది. దేవాలయాల్లో పూజారులు మహిళలపై లైంగిక వేధింపులకు పాల్పడుతున్నారంటూ ఆమె చేసిన వ్యాఖ్యలపై అభ్యంతరం వ్యక్తం చేస్తూ ఢిల్లీ హైకోర్టు మహిళా న్యాయవాది అమితా సచ్‌దేవా పార్లమెంట్ స్ట్రీట్ పోలీస్ స్టేషన్‌లో ఫిర్యాదు చేశారు. ఈ వ్యవహారంపై చట్ట ప్రకారం విచారణ జరిపి, బాధ్యులపై తగిన చర్యలు తీసుకోవాలని ఆమె పోలీసులను కోరారు.
నేహా బోరా చేసిన వ్యాఖ్యలు ఒక మత వర్గం ప్రతిష్టను దెబ్బతీసేలా ఉన్నాయని అమితా సచ్‌దేవా తన ఫిర్యాదులో పేర్కొన్నారు. దేవాలయాల్లో పూజారులు మహిళలపై లైంగిక దాడులకు పాల్పడుతున్నారంటూ సాధారణీకరించి చేసిన వ్యాఖ్యలు ప్రజల్లో తప్పుడు అభిప్రాయాలను కలిగించే అవకాశం ఉందని ఆమె అభ్యంతరం వ్యక్తం చేశారు. ఇలాంటి ప్రకటనలు మతపరమైన మనోభావాలను దెబ్బతీయడంతో పాటు సమాజంలో సామరస్యానికి విఘాతం కలిగించవచ్చని పేర్కొన్నారు.
ఇదిలా ఉండగా, నేహా బోరా వ్యాఖ్యలపై భారతీయ జనతా పార్టీ (బీజేపీ) కూడా తీవ్రంగా స్పందించింది. కాంగ్రెస్ అగ్రనేత రాహుల్ గాంధీ గతంలో చేసిన వ్యాఖ్యలను నేహా బోరా మరో రూపంలో పునరావృతం చేస్తున్నారని బీజేపీ ఆరోపించింది. ఈ మేరకు తన అధికారిక సోషల్ మీడియా వేదిక ‘ఎక్స్‌’లో నేహా బోరా తాజా వ్యాఖ్యలతో పాటు రాహుల్ గాంధీ గతంలో చేసిన ప్రకటనను కూడా పంచుకుంది.
ఈ సందర్భంగా బీజేపీ కాంగ్రెస్ పార్టీపై విమర్శలు గుప్పించింది. నేహా బోరాను కాంగ్రెస్ కొత్త పోస్టర్ గర్ల్‌గా అభివర్ణిస్తూ, సనాతన ధర్మం, హిందూ మత విశ్వాసాలను అగౌరవపరిచేలా ఆ పార్టీ నేతలు వ్యవహరిస్తున్నారని ఆరోపించింది. వారి సనాతన వ్యతిరేక, అరాచక భావజాలం దేశానికి ముప్పుగా మారుతోందని తన పోస్టులో పేర్కొంది. మొత్తంగా నేహా బోరా వ్యాఖ్యలు ప్రస్తుతం రాజకీయంగా, సామాజికంగా చర్చనీయాంశంగా మారాయి.