D News: Nov 3: రాప్తాడు బాలికపై ఎలక్ట్రిక్ రంపంతో దాడి.. నిందితుడిపై కఠిన సెక్షన్లతో కేసు నమోదు!
ఆంధ్రప్రదేశ్‌లోని రాప్తాడులో బాలికపై ఎలక్ట్రిక్ రంపంతో దాడి చేసిన ఘటన తీవ్ర కలకలం రేపింది. ఈ ఘటనను పోలీసులు తీవ్రంగా పరిగణించి నిందితుడిపై పలు కఠిన సెక్షన్ల కింద కేసు నమోదు చేశారు. ముందస్తు ప్రణాళికతో హత్యాయత్నానికి పాల్పడినట్లు ఆరోపణలు రావడంతో భారతీయ న్యాయ సంహిత (BNS) సెక్షన్ 101(1)ను కేసులో చేర్చినట్లు సమాచారం.
ఎలక్ట్రిక్ రంపంతో దాడి చేసి బాలికను గాయపరిచినందుకు BNS సెక్షన్ 118(1), పాఠశాల ప్రాంగణంలోకి ప్రవేశించి ఆయుధంతో దాడికి పాల్పడినందుకు సెక్షన్ 333 కింద కేసు నమోదు చేసినట్లు తెలుస్తోంది. ఈ ఘటనలో గాయపడిన మరో బాలిక ఎస్సీ సామాజిక వర్గానికి చెందినది కావడంతో ఎస్సీ, ఎస్టీ అట్రాసిటీ నిరోధక చట్టంలోని సెక్షన్ 3(2)(V)ను కూడా పోలీసులు చేర్చినట్లు సమాచారం. దీంతో నిందితుడిపై నమోదైన కేసు మరింత తీవ్రంగా మారింది.
జీవిత ఖైదు పడే అవకాశం.. కీలకంగా మారిన సెక్షన్లు!
నిందితుడిపై నమోదు చేసిన సెక్షన్లు ఈ కేసులో కీలకంగా మారనున్నాయి. ముఖ్యంగా హత్యాయత్నం, ఆయుధంతో దాడి, అక్రమంగా పాఠశాలలోకి ప్రవేశించడం, ఎస్సీ సామాజిక వర్గానికి చెందిన బాలికపై నేరానికి సంబంధించిన ఆరోపణలపై న్యాయస్థానంలో విచారణ జరగనుంది.
ఈ సెక్షన్ల కింద నేరం రుజువైతే నిందితుడికి జీవిత ఖైదు సహా కఠిన శిక్షలు పడే అవకాశం ఉందని తెలుస్తోంది. అయితే ఎలాంటి శిక్ష విధించాలనేది నేరం రుజువు కావడం, సమర్పించే సాక్ష్యాధారాలు, న్యాయస్థానం పరిశీలనపై ఆధారపడి ఉంటుంది.
మరోవైపు, రాప్తాడు ఘటనపై ప్రజల్లో తీవ్ర ఆగ్రహం వ్యక్తమవుతోంది. పాఠశాలల్లో విద్యార్థుల భద్రతను మరింత పటిష్టం చేయాలని, ఇలాంటి ఘటనలు పునరావృతం కాకుండా ప్రభుత్వం, పోలీసులు కఠిన చర్యలు తీసుకోవాలని పలువురు కోరుతున్నారు.