D News: Oct 31: ఏపీ, తెలంగాణకు భారీ వర్ష సూచన.. పలు జిల్లాలకు అలర్ట్ జారీ
హైదరాబాద్: ఆంధ్రప్రదేశ్, తెలంగాణ రాష్ట్రాల్లో వర్షాలు కురుస్తున్నాయి. శుక్రవారం ఏపీలోని పలు జిల్లాల్లో భారీ వర్షాలు నమోదయ్యాయి. రానున్న రోజుల్లో వర్ష తీవ్రత మరింత పెరిగే అవకాశం ఉందని అమరావతి వాతావరణ కేంద్రం వెల్లడించింది. బంగాళాఖాతంలో ఏర్పడిన అల్పపీడనం ప్రస్తుతం పశ్చిమ వాయువ్య దిశగా కదులుతూ క్రమంగా బలపడుతోంది. ఇది శనివారం నాటికి వాయుగుండంగా మారే అవకాశం ఉందని వాతావరణ అధికారులు అంచనా వేస్తున్నారు. దీని ప్రభావంతో ఆంధ్రప్రదేశ్, తెలంగాణ రాష్ట్రాల్లో రానున్న కొన్ని రోజుల పాటు విస్తారంగా వర్షాలు కురిసే అవకాశం ఉందని తెలిపారు.
ఏపీకి భారీ నుంచి అతిభారీ వర్షాల హెచ్చరిక
వాయుగుండం ప్రభావంతో ఆంధ్రప్రదేశ్‌లో రేపటి నుంచి వర్షాల తీవ్రత పెరగనుంది. ముఖ్యంగా ఉత్తర కోస్తా జిల్లాల్లో రేపు, ఎల్లుండి భారీ నుంచి అతిభారీ వర్షాలు కురిసే అవకాశం ఉందని వాతావరణ శాఖ హెచ్చరించింది. నేడు అన్నమయ్య, కృష్ణా, విజయనగరం, నంద్యాల జిల్లాల్లో మోస్తరు వర్షాలు కురిసే సూచనలు ఉన్నట్లు తెలిపింది.
మరోవైపు సముద్రం అలజడిగా మారే అవకాశం ఉన్నందున మత్స్యకారులు అప్రమత్తంగా ఉండాలని అధికారులు సూచించారు. రేపటి నుంచి తదుపరి హెచ్చరికలు జారీ చేసే వరకు ఎవరూ చేపల వేటకు సముద్రంలోకి వెళ్లవద్దని స్పష్టం చేశారు.
తెలంగాణలో పలు జిల్లాలకు ఆరెంజ్ అలర్ట్
తెలంగాణలోనూ వాతావరణ శాఖ అప్రమత్తత ప్రకటించింది. రాష్ట్రంలోని పలు జిల్లాలకు ఆరెంజ్ అలర్ట్ జారీ చేసింది. వర్షాలతో పాటు గంటకు 40 కిలోమీటర్ల కంటే తక్కువ వేగంతో ఈదురుగాలులు వీచే అవకాశం ఉందని తెలిపింది. ఉరుములు, మెరుపులతో కూడిన వర్షాలు కురిసే అవకాశం ఉన్నందున ప్రజలు జాగ్రత్తగా ఉండాలని సూచించింది.
ఈ జిల్లాల్లో వర్షాల ప్రభావం అధికం
భద్రాద్రి కొత్తగూడెం, మెదక్, నల్గొండ, సంగారెడ్డి, సిద్దిపేట, వికారాబాద్ జిల్లాల్లో వర్షాల ప్రభావం ఎక్కువగా ఉండే అవకాశం ఉందని వాతావరణ శాఖ పేర్కొంది. ఆయా జిల్లాల ప్రజలు అప్రమత్తంగా ఉండాలని, ఉరుములు, మెరుపులతో కూడిన వర్షాలు పడే సమయంలో చెట్ల కింద, విద్యుత్ స్తంభాల సమీపంలో ఉండకూడదని సూచించింది.