D News: Oct 24: డ్రైవింగ్ లైసెన్స్: జారీ ప్రక్రియలో కీలక మార్పులకు కేంద్రం ప్రతిపాదనలు
దేశంలో డ్రైవింగ్ లైసెన్సుల జారీ, నిర్వహణ ప్రక్రియను మరింత పటిష్టం చేసేందుకు కేంద్ర రోడ్డు రవాణా, రహదారుల మంత్రిత్వ శాఖ కీలక మార్పులను ప్రతిపాదించింది. ఈ మేరకు సెంట్రల్ మోటార్ వెహికల్స్ రూల్స్‌కు సవరణలు చేస్తూ రూపొందించిన ముసాయిదా నోటిఫికేషన్‌లో పలు ప్రతిపాదనలను పొందుపరిచింది. వీటి ద్వారా లైసెన్సుల జారీ ప్రక్రియలో పారదర్శకత పెంచడంతో పాటు రహదారి భద్రతకు ప్రాధాన్యత ఇవ్వాలని ప్రభుత్వం లక్ష్యంగా పెట్టుకుంది.
భారతీయులు, విదేశీయులకు వేర్వేరు లైసెన్స్ డిజైన్లు
కొత్త ప్రతిపాదనల ప్రకారం ఇకపై జారీ చేసే లేదా రెన్యూవల్ చేసే ప్రతి డ్రైవింగ్ లైసెన్స్‌ను ఫామ్‌-7లో లామినేటెడ్ లేదా పీవీసీ కార్డు రూపంలో అందించాల్సి ఉంటుంది. భారతీయ పౌరులు, విదేశీయులకు వేర్వేరు ఫార్మాట్లు, రంగులతో ప్రత్యేక లైసెన్స్ డిజైన్లను ప్రవేశపెట్టాలని ప్రతిపాదించారు.
అత్యవసర సమాచారానికి ప్రాధాన్యత
రోడ్డు ప్రమాదాలు లేదా ఇతర అత్యవసర పరిస్థితుల్లో బాధితులకు త్వరగా సహాయం అందించేందుకు డ్రైవింగ్ లైసెన్స్‌పై వాహనదారుడి బ్లడ్ గ్రూప్, మొబైల్ నంబర్, అత్యవసర సమయంలో సంప్రదించాల్సిన వ్యక్తుల వివరాలను తప్పనిసరిగా ముద్రించాలని ప్రతిపాదించారు. దీనివల్ల అత్యవసర సమయాల్లో అవసరమైన సమాచారాన్ని సులభంగా తెలుసుకునే అవకాశం ఉంటుంది.
నోటరీ అఫిడవిట్లకు చెక్
వయస్సు, చిరునామా ధ్రువీకరణ కోసం ఎగ్జిక్యూటివ్ మేజిస్ట్రేట్ లేదా నోటరీ ముందు సమర్పించే అఫిడవిట్లను ఇకపై ఆమోదించకూడదని ముసాయిదాలో ప్రతిపాదించారు. వీటికి బదులుగా ఆధార్ కార్డు, పాస్‌పోర్ట్, ఓటర్ ఐడీ కార్డు, ఈ-రేషన్ కార్డు, జనన ధ్రువీకరణ పత్రం, లైఫ్ ఇన్సూరెన్స్ పాలసీలు, ఇతర నిర్దేశిత ధ్రువీకరణ పత్రాలను ఉపయోగించుకోవచ్చని పేర్కొన్నారు.
కఠినతరం కానున్న డ్రైవింగ్ అసెస్‌మెంట్
సురక్షిత డ్రైవింగ్‌ను ప్రోత్సహించేందుకు అసెస్‌మెంట్ ప్రమాణాలను మరింత కఠినతరం చేయాలని ప్రభుత్వం ప్రతిపాదించింది. ఇందులో భాగంగా సేఫ్ డ్రైవింగ్ ట్యుటోరియల్ వ్యవధి కనీసం 30 నిమిషాలు ఉండాలని పేర్కొన్నారు. అలాగే ఈ ట్యుటోరియల్ అసెస్‌మెంట్‌లో అర్హత సాధించేందుకు అవసరమైన కనీస మార్కులను 60 శాతం నుంచి 75 శాతానికి పెంచాలని ప్రతిపాదించారు.
ఆన్‌లైన్ సేవలకు ఫీజు మినహాయింపులు
పాస్‌పోర్ట్ లేదా ఆధార్ ఆథెంటికేషన్ ద్వారా ఆన్‌లైన్ సేవలను వినియోగించుకునే వారికి ఫీజు మినహాయింపులు కల్పించాలని ముసాయిదాలో పేర్కొన్నారు. పేరు, చిరునామా వంటి వ్యక్తిగత వివరాలను అప్‌డేట్ చేసేందుకు ప్రస్తుతం వసూలు చేస్తున్న రుసుమును రద్దు చేయాలని ప్రతిపాదించారు. ఈ మార్పులు అమల్లోకి వస్తే లైసెన్స్ వివరాలను ఆన్‌లైన్‌లో సవరించుకునే వారికి ప్రయోజనం కలగనుంది.
15 రోజుల్లోనే దరఖాస్తులపై నిర్ణయం
డ్రైవింగ్ లైసెన్స్ వివరాల అప్‌డేట్ కోసం వచ్చిన దరఖాస్తులను లైసెన్సింగ్ అధికారులు 15 రోజుల్లోగా ఆమోదించడం లేదా తిరస్కరించడం చేయాలని ప్రతిపాదించారు. ఒకవేళ దరఖాస్తును తిరస్కరిస్తే అందుకు గల స్పష్టమైన కారణాలను సంబంధిత అధికారులే తెలియజేయాల్సి ఉంటుంది. దీనివల్ల దరఖాస్తుల పరిష్కారంలో జాప్యాన్ని తగ్గించడంతో పాటు జవాబుదారీతనం పెరుగుతుందని భావిస్తున్నారు.
సూచనలు, అభ్యంతరాలకు 30 రోజుల గడువు
ఈ సవరణల ద్వారా డ్రైవింగ్ లైసెన్స్ జారీ, అసెస్‌మెంట్ ప్రక్రియ మరింత పారదర్శకంగా, పటిష్టంగా మారుతుందని రవాణా శాఖ భావిస్తోంది. ముసాయిదా నోటిఫికేషన్‌పై ప్రజలు, నిపుణులు తమ అభ్యంతరాలు, సూచనలను నోటిఫికేషన్ విడుదలైన తేదీ నుంచి 30 రోజుల్లోగా సమర్పించవచ్చని మంత్రిత్వ శాఖ పేర్కొంది. ప్రజల నుంచి వచ్చే అభిప్రాయాలను పరిశీలించిన అనంతరం తదుపరి చర్యలు తీసుకునే అవకాశం ఉంది.