D NEWS: లోక్‌సభ ఎన్నికల్లో పోటీ చేసినందుకే తనపై అనర్హత వేటు పడిందని ఖైరతాబాద్ మాజీ ఎమ్మెల్యే దానం నాగేందర్ అన్నారు. ఇలాంటి పరిస్థితి వస్తుందని తనకు ముందే తెలుసని, ఖైరతాబాద్‌లో ఉప ఎన్నిక జరుగుతుందని భావించే తాను లోక్‌సభ ఎన్నికల్లో పోటీ చేశానని తెలిపారు.
విజయారెడ్డి తనపై దాఖలు చేసిన ఎన్నికల పిటిషన్‌పై దానం నాగేందర్ స్పందించారు. అఫిడవిట్‌కు సంబంధించి తనపై వచ్చిన ఆరోపణలకు ఇప్పటికే కోర్టు, ఎన్నికల సంఘానికి సమాధానం ఇచ్చానని చెప్పారు. ఆరోపణల్లో పేర్కొన్న ఆస్తులకు తనకు లేదా తన భార్యకు సంబంధం లేదని, తప్పుడు సంతకాల ఆధారంగా ఆరోపణలు చేస్తున్నారని పేర్కొన్నారు.
ఖైరతాబాద్ ఉప ఎన్నిక నిర్వహణకు సంబంధించి సుప్రీంకోర్టు స్పష్టత ఇచ్చిన నేపథ్యంలో ఇప్పుడు ఎన్నికల పిటిషన్ వేయడం అర్థరహితమని దానం నాగేందర్ వ్యాఖ్యానించారు. పిటిషన్ దాఖలు చేసే ముందు అన్ని అంశాలను పరిశీలించాల్సిన అవసరం ఉందని అన్నారు.
తన అనర్హతకు సంబంధించిన అంశాలపై సుప్రీంకోర్టు నిర్ణయం తీసుకుందని దానం నాగేందర్ తెలిపారు. లోక్‌సభ ఎన్నికల్లో పోటీ చేయడం, అఫిడవిట్‌కు సంబంధించిన అంశాలపై తాను ఇప్పటికే వివరణ ఇచ్చానని పేర్కొన్నారు.
విజయారెడ్డి పిటిషన్ కారణంగా ఖైరతాబాద్ ఉప ఎన్నిక నిర్వహణకు ఆటంకం ఏర్పడితే ఎన్నికల సంఘమే నేరుగా కోర్టును ఆశ్రయించే అవకాశం ఉందని దానం నాగేందర్ అన్నారు. అవసరమైతే న్యాయ నిపుణులతో చర్చించి తాను కూడా కోర్టును ఆశ్రయిస్తానని తెలిపారు.