D News : విక్టరీ వెంకటేష్, మాటల మాంత్రికుడు త్రివిక్రమ్ శ్రీనివాస్ కాంబినేషన్‌లో తెరకెక్కుతున్న ‘ఆదర్శ కుటుంబం’పై ప్రేక్షకుల్లో భారీ అంచనాలు ఉన్నాయి. ఇప్పటికే పలుమార్లు వాయిదా పడిన ఈ సినిమా అక్టోబర్ 9న థియేటర్లలోకి వస్తుందని మేకర్స్ ప్రకటించారు. అయితే ఇప్పుడు మరోసారి రిలీజ్ డేట్ మారే అవకాశాలు కనిపిస్తున్నాయి.
అక్టోబర్ 30కి వాయిదా?
అక్టోబర్ 9న విడుదల కావాల్సిన ‘ఆదర్శ కుటుంబం’ను మరోసారి వాయిదా వేయాలని చిత్రబృందం భావిస్తున్నట్లు తాజా సమాచారం. ప్రస్తుతం అక్టోబర్ 30 తేదీని కొత్త రిలీజ్ డేట్‌గా పరిశీలిస్తున్నట్లు తెలుస్తోంది. అయితే దీనిపై ఇప్పటివరకు అధికారిక ప్రకటన రాలేదు. అక్టోబర్ 16 తేదీ కూడా పరిశీలనలో ఉన్నట్లు కొన్ని నివేదికలు చెబుతున్నాయి.
పోస్ట్ ప్రొడక్షన్ పనులే కారణమా?
సినిమాకు సంబంధించిన రీ-రికార్డింగ్, ఇతర పోస్ట్ ప్రొడక్షన్ పనులు ఇంకా పూర్తికావాల్సి ఉండటంతో మరికొంత సమయం తీసుకోవాలని మేకర్స్ భావిస్తున్నట్లు సమాచారం. సినిమా క్వాలిటీ విషయంలో తొందరపడకుండా పనులను పూర్తి చేయాలని చిత్రబృందం నిర్ణయించినట్లు టాక్ వినిపిస్తోంది.
ఇటీవల నిర్మాత నాగవంశీ అక్టోబర్ 9న సినిమా విడుదలపై ఎలాంటి సందేహాలు పెట్టుకోవద్దని స్పష్టం చేశారు. దీంతో మరోసారి వాయిదా వార్తలు రావడం వెంకీ అభిమానుల్లో ఆసక్తిని పెంచుతోంది.
అధికారిక ప్రకటన ఎప్పుడు?
వెంకటేష్, త్రివిక్రమ్ కాంబినేషన్ కావడంతో ‘ఆదర్శ కుటుంబం’పై మొదటి నుంచే మంచి అంచనాలు ఉన్నాయి. శ్రీనిధి శెట్టి కథానాయికగా నటిస్తున్న ఈ సినిమాలో నారా రోహిత్, నివేదా పేతురాజ్, రావు రమేష్, వెన్నెల కిశోర్, సత్య తదితరులు కీలక పాత్రల్లో కనిపించనున్నారు. థమన్ సంగీతం అందిస్తున్నారు.
అక్టోబర్ 30న విడుదల చేయాలనే ఆలోచనలో మేకర్స్ ఉన్నారనే వార్తలు ప్రస్తుతం వైరల్ అవుతున్నాయి. అయితే అక్టోబర్ 9 రిలీజ్ కొనసాగుతుందా? లేక అక్టోబర్ 30కి మారుతుందా? అనేది చిత్రబృందం అధికారిక ప్రకటనతోనే క్లారిటీ రానుంది.