D NEWS: ఖైరతాబాద్ ఉప ఎన్నికను ఓటమి భయంతో కాంగ్రెస్ పార్టీ అడ్డుకుంటోందని బీజేపీ ఎంపీ డీకే అరుణ ఆరోపించారు. ఇక్కడ గెలవలేమనే భయంతో ముఖ్యమంత్రి రేవంత్ రెడ్డి హైకోర్టులో పిటిషన్ వేయించారని ఆమె ఆరోపించారు.
గతంలో బీఆర్ఎస్, ఇప్పుడు కాంగ్రెస్ పార్టీ ఫిరాయింపులను ప్రోత్సహించాయని డీకే అరుణ విమర్శించారు. తమ ప్రభుత్వ పరిపాలనపై విశ్వాసం ఉంటే పార్టీ ఫిరాయించిన ఎమ్మెల్యేలందరితో రాజీనామా చేయించాలని సీఎం రేవంత్ రెడ్డికి సవాల్ విసిరారు.
ఖైరతాబాద్ ప్రజలు కాంగ్రెస్, బీఆర్ఎస్ పార్టీలను తిరస్కరించాలని డీకే అరుణ పిలుపునిచ్చారు. గతంలో ఖైరతాబాద్ నియోజకవర్గంలో బీజేపీ విజయం సాధించిందని, రాబోయే ఉప ఎన్నికలోనూ తమ పార్టీ గెలుస్తుందనే నమ్మకం ఉందన్నారు.
బీఆర్ఎస్, కాంగ్రెస్ రెండు పార్టీల పాలనలో తెలంగాణ అప్పుల పాలైందని ఆమె ఆరోపించారు. రాష్ట్రంలో ఎక్కడ అభివృద్ధి పనుల గురించి మాట్లాడినా నిధులు లేవనే సమాధానం వస్తోందని విమర్శించారు.
బీఆర్ఎస్, కాంగ్రెస్ రెండూ ఒక్కటేనని డీకే అరుణ ఆరోపించారు. ఈ రెండు పార్టీలకు ఖైరతాబాద్ ప్రజలు గుణపాఠం చెప్పాలని ఆమె కోరారు. ఉప ఎన్నిక నేపథ్యంలో డీకే అరుణ వ్యాఖ్యలు తెలంగాణ రాజకీయాల్లో మరోసారి చర్చకు దారితీశాయి.