D Spiritual: Oct 2: తిరుమల శ్రీ వెంకటేశ్వర స్వామివారి ఆలయంలో భక్తుల రద్దీ ఒక్కసారిగా పెరిగింది. పవిత్ర వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు భక్తులతో పూర్తిగా నిండిపోయాయి. ప్రత్యేక దర్శనం లేదా శీఘ్ర దర్శన టోకెన్లు లేకుండా సర్వదర్శనం కోసం వచ్చే భక్తులకు స్వామివారి దర్శనానికి సుమారు 18 గంటల సమయం పడుతున్నట్లు తిరుమల తిరుపతి దేవస్థానం (టీటీడీ) అధికారులు తెలిపారు.
తిరుమల శ్రీవారిని దర్శించుకునేందుకు భక్తులు పెద్ద సంఖ్యలో తరలివస్తున్నారు. నిన్న ఒక్కరోజే దేశంలోని వివిధ ప్రాంతాలతో పాటు విదేశాల నుంచి వచ్చిన 78,026 మంది భక్తులు స్వామివారిని దర్శించుకుని మొక్కులు చెల్లించుకున్నారు. భక్తుల రద్దీ అధికంగా ఉండటంతో టీటీడీ అధికారులు అందుకు అనుగుణంగా ఏర్పాట్లు చేస్తూ, భక్తులకు ఎలాంటి అసౌకర్యం కలగకుండా చర్యలు చేపడుతున్నారు.
శ్రీవారిని దర్శించుకున్న భక్తుల్లో పలువురు తమ మొక్కులను తీర్చుకున్నారు. నిన్న ఒక్కరోజే 31,116 మంది భక్తులు తలనీలాలు సమర్పించారు. మరోవైపు, భక్తులు హుండీలో సమర్పించిన కానుకల ద్వారా తిరుమల శ్రీవారి హుండీ ఆదాయం రూ.5.12 కోట్లుగా నమోదైనట్లు టీటీడీ అధికారులు వెల్లడించారు.