D NEWS: సింగరేణి విద్యుత్‌ను రాజస్థాన్‌కు కేటాయించే ప్రతిపాదనను మాజీ మంత్రి హరీశ్‌రావు వ్యతిరేకించారు. జైపూర్ సింగరేణి థర్మల్ పవర్ ప్లాంట్‌లో ఉత్పత్తయ్యే 800 మెగావాట్ల విద్యుత్‌ను ఇతర రాష్ట్రానికి కేటాయించడం ప్రజా ప్రయోజనాలకు విరుద్ధమని సీఎం రేవంత్‌రెడ్డిని ప్రశ్నించారు.
సింగరేణి బొగ్గు, తెలంగాణ నీరు, రాష్ట్ర భూమితో విద్యుత్ ఉత్పత్తి చేస్తున్నప్పుడు ఆ విద్యుత్‌ను రాజస్థాన్‌కు ఎలా కేటాయిస్తారని హరీశ్‌రావు ప్రశ్నించారు. సొంత రాష్ట్రంలో రైతులకు విద్యుత్ సమస్యలు ఉన్న సమయంలో ఇతర రాష్ట్రానికి విద్యుత్ ఇవ్వడంపై ప్రభుత్వం పునరాలోచించాలని కోరారు.
సింగరేణి నుంచి సుమారు రూ.22 వేల కోట్ల పెట్టుబడిని రాజస్థాన్ అభివృద్ధికి మళ్లించడం ఎందుకని ఆయన ప్రశ్నించారు. రైతులకు 24 గంటల విద్యుత్ అందిస్తున్నామని ప్రభుత్వం చెబుతున్నప్పటికీ క్షేత్రస్థాయిలో 7–8 గంటలు కూడా సరఫరా కావడం లేదని ఆరోపించారు. విద్యుత్ కోతలకు ఎల్‌నినోను కారణంగా చూపడం సరికాదన్నారు.
యాదాద్రి, కొత్తగూడెం, భద్రాద్రి విద్యుత్ కేంద్రాల్లో బొగ్గు నాణ్యత, సరఫరాపై కూడా హరీశ్‌రావు విమర్శలు చేశారు. యాదాద్రికి అవసరమైన నాణ్యత బొగ్గుకు బదులుగా తక్కువ గ్రేడ్ బొగ్గు వినియోగిస్తున్నారని ఆయన ఆరోపించారు. విద్యుత్ ఉత్పత్తి, బొగ్గు నిల్వలపై క్షేత్రస్థాయి పరిశీలనకు వెళ్లిన బీఆర్ఎస్ నేతలను పోలీసులు అడ్డుకున్నారని పేర్కొన్నారు.
రాష్ట్ర విభజన హామీ ప్రకారం ఎన్టీపీసీ నుంచి తెలంగాణకు రావాల్సిన 1,600 మెగావాట్ల విద్యుత్ కోసం వెంటనే పీపీఏ చేసుకోవాలని హరీశ్‌రావు డిమాండ్ చేశారు. రాజస్థాన్ విద్యుత్ ఒప్పందాన్ని రద్దు చేయకపోతే రైతుల పక్షాన బీఆర్ఎస్ పోరాటం చేస్తుందని హెచ్చరించారు.