D NEWS: సీఎం రేవంత్‌రెడ్డి సిరిసిల్ల పర్యటన నేపథ్యంలో కాంగ్రెస్‌ శ్రేణుల్లో కొత్త చర్చ మొదలైంది. భారీ బహిరంగ సభ వేదికగా సిరిసిల్ల నియోజకవర్గ కాంగ్రెస్‌ ఇన్‌చార్జి కేకే మహేందర్‌రెడ్డికి కీలక పదవి ప్రకటించే అవకాశం ఉందన్న ప్రచారం పార్టీ వర్గాల్లో ఆసక్తిని పెంచుతోంది.
మహేందర్‌రెడ్డి పేరు ఇప్పటికే పలు రాజకీయ చర్చల్లో వినిపిస్తోంది. పార్టీ కోసం చాలాకాలంగా పనిచేస్తున్న ఆయనకు ఈసారైనా కీలక బాధ్యతలు దక్కుతాయా అనే చర్చ అనుచరుల్లో కొనసాగుతోంది.
సీఎం సభలో పదవిపై అధికారిక ప్రకటన ఉంటుందనే విషయం మాత్రం ఇప్పటివరకు స్పష్టంగా లేదు. దీంతో సభా వేదికగా ఏదైనా కీలక ప్రకటన వస్తుందా? లేక మహేందర్‌రెడ్డి మరోసారి నిరీక్షించాల్సి వస్తుందా? అనే ఉత్కంఠ నెలకొంది.
మరోవైపు సోషల్‌ మీడియా వేదికగా పలువురు కాంగ్రెస్‌ నాయకులు, కార్యకర్తలు మహేందర్‌రెడ్డికి కీలక పదవి ఇవ్వాలని ఆకాంక్ష వ్యక్తం చేస్తున్నారు. పార్టీ కోసం ఆయన చేసిన కృషిని గుర్తించి బాధ్యతలు అప్పగించాలని కోరుతున్నట్లు తెలుస్తోంది.
సిరిసిల్లలో సీఎం పర్యటనకు కాంగ్రెస్‌ శ్రేణులు భారీ ఏర్పాట్లు చేశాయి. అభివృద్ధి కార్యక్రమాలతో పాటు రాజకీయంగా కూడా సీఎం ఏమైనా కీలక ప్రకటన చేస్తారా అనే ఆసక్తి నెలకొంది. కేకే మహేందర్‌రెడ్డి పదవి అంశంపై స్పష్టత మాత్రం సీఎం సభలో వెలువడే ప్రకటనతోనే వచ్చే అవకాశం ఉంది.