D NEWS: నల్లగొండ జిల్లా నాంపల్లి తహసీల్దార్ కార్యాలయంలో ఏసీబీ అధికారులు దాడులు నిర్వహించారు. రూ.15 వేల లంచం తీసుకుంటున్న ఆర్‌ఐ గోపరాజు, అతని అసిస్టెంట్ యాదగిరిని అధికారులు పట్టుకున్నారు. పౌతి కోసం లంచం డిమాండ్ చేసినట్లు ఆరోపణలు ఉన్నాయి.
మండలానికి చెందిన ఓ రైతు పౌతి కోసం ఆర్‌ఐ గోపరాజును సంప్రదించినట్లు అధికారులు తెలిపారు. ఈ సందర్భంగా ఆర్‌ఐ లంచం డిమాండ్ చేసినట్లు పేర్కొన్నారు. దీంతో రైతు ఏసీబీ అధికారులను ఆశ్రయించినట్లు సమాచారం.
సోమవారం ఆర్‌ఐ అసిస్టెంట్ యాదగిరి రూ.15 వేల నగదును తీసుకున్నట్లు అధికారులు తెలిపారు. అనంతరం ఆ మొత్తాన్ని ఆర్‌ఐకి అప్పగించిన సమయంలో ఏసీబీ అధికారులు ఇద్దరినీ రెడ్‌హ్యాండెడ్‌గా పట్టుకున్నట్లు వెల్లడించారు.
ఈ ఘటనపై ఏసీబీ అధికారులు కేసు నమోదు చేశారు. ఆర్‌ఐ గోపరాజు, అసిస్టెంట్ యాదగిరిని అదుపులోకి తీసుకుని విచారణ చేపట్టారు. లంచం డిమాండ్‌కు సంబంధించిన పూర్తి వివరాలపై దర్యాప్తు కొనసాగుతున్నట్లు అధికారులు తెలిపారు.