D NEWS: కేంద్ర ఎన్నికల ప్రధాన కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ సంగారెడ్డిలో కాంగ్రెస్ శ్రేణులు ఆందోళన చేపట్టాయి. SIR ప్రక్రియ, ఓటర్ల జాబితా సవరణపై పార్టీ నేతలు పలు ఆరోపణలు చేశారు. అనంతరం కలెక్టరేట్‌లో అడిషనల్ కలెక్టర్ సంగీతకు వినతిపత్రం అందజేశారు.
డీసీసీ అధ్యక్షుడు చంద్రశేఖర్‌రెడ్డి ఆధ్వర్యంలో జరిగిన కార్యక్రమంలో కాంగ్రెస్ నేతలు ఎన్నికల సంఘం పనితీరును ప్రశ్నించారు. SIR ప్రక్రియపై పారదర్శకత, స్పష్టత అవసరమని డిమాండ్ చేశారు. జ్ఞానేశ్ కుమార్ రాజీనామా చేసే వరకు నిరసనలు కొనసాగిస్తామని చంద్రశేఖర్‌రెడ్డి తెలిపారు.
నిర్మల జగ్గారెడ్డి మాట్లాడుతూ ఓట్ల చోరీ అంశాన్ని రాహుల్ గాంధీ గత రెండేళ్లుగా ప్రస్తావిస్తున్నారని అన్నారు. తనకు 14 రకాల పత్రాలు సమర్పించినప్పటికీ నోటీసు వచ్చిందని చెప్పారు. ప్రజాస్వామ్య వ్యతిరేక విధానాలను ప్రజలు ఐక్యంగా తిప్పికొట్టాలని పిలుపునిచ్చారు.
నారాయణఖేడ్ ఎమ్మెల్యే సంజీవరెడ్డి SIR ప్రక్రియపై మరో ఆరోపణ చేశారు. నియోజకవర్గంలో సుమారు 40 వేల మందికి నోటీసులు వచ్చాయని తెలిపారు. దళితులు, మైనార్టీల ఓట్లను లక్ష్యంగా చేసుకుని తొలగింపులు జరుగుతున్నాయని కాంగ్రెస్ ఆరోపించింది.
ఎంపీ సురేష్ మాట్లాడుతూ బీహార్, పశ్చిమ బెంగాల్ ఎన్నికల్లో అక్రమాలు జరిగాయని కాంగ్రెస్ ఆరోపిస్తోందన్నారు. దక్షిణ భారతదేశంలోనూ ఇదే విధానం కొనసాగించేందుకు ప్రయత్నాలు జరుగుతున్నాయని ఆయన ఆరోపించారు. కార్యక్రమంలో మెదక్ పార్లమెంట్ ఇన్‌చార్జి నీల మధు, పలువురు కాంగ్రెస్ నేతలు, ప్రజాప్రతినిధులు పాల్గొన్నారు.