యూపీఐ (UPI) లావాదేవీలపై మర్చంట్ డిస్కౌంట్ రేట్ (MDR) విధింపుపై వస్తున్న ప్రచారానికి కేంద్ర ప్రభుత్వం మంగళవారం స్పష్టతనిచ్చింది. ఈ విషయంలో ఎలాంటి అపోహలు అవసరం లేదని పేర్కొంది. ముఖ్యంగా చిరు వ్యాపారులపై ఎలాంటి అదనపు భారం పడదని స్పష్టం చేసింది.
రూ.2 వేల వరకు జరిగే మర్చంట్ పేమెంట్లకు MDR పూర్తిగా సున్నా అని కేంద్రం తెలిపింది. ఈ లావాదేవీలపై జీఎస్టీ భారం కూడా ఉండదని వెల్లడించింది. ప్రభుత్వ గణాంకాల ప్రకారం.. మెజారిటీ డిజిటల్ చెల్లింపులకు MDR వర్తించదని పేర్కొంది.
MDR పై వ్యాపారి చెల్లించిన జీఎస్టీని ఇన్‌పుట్ ట్యాక్స్ క్రెడిట్‌గా క్లెయిమ్ చేసుకుని అమ్మకాలపై చెల్లించాల్సిన జీఎస్టీ నుంచి సర్దుబాటు చేసుకునే అవకాశం ఉందని కేంద్రం వివరించింది.
అలాగే నెలకు రూ.లక్ష వరకు UPI రశీదులు పొందే వ్యాపారులకు MDR వర్తించదని స్పష్టం చేసింది. దీంతో వారికి MDRపై జీఎస్టీ చెల్లించాల్సిన సమస్య కూడా ఉండదని తెలిపింది.
UPI చెల్లింపులు ఇకపై ఖరీదవుతాయన్న వాదనలు తప్పుదారి పట్టించేవేనని కేంద్రం పేర్కొంది. ప్రతిపాదిత మార్పుల వల్ల మెజారిటీ డిజిటల్ లావాదేవీలు, ముఖ్యంగా చిరు వ్యాపారుల లావాదేవీలు ప్రభావితం కావని స్పష్టం చేసింది.
