D NEWS: గ్రాడ్యుయేట్ ఎమ్మెల్సీ ఓటర్ల జాబితా తయారీ షెడ్యూల్పై బీఆర్ఎస్ నేతలు అభ్యంతరం వ్యక్తం చేశారు. ఈ మేరకు రాష్ట్ర ప్రధాన ఎన్నికల అధికారి సి. సుదర్శన్రెడ్డిని కలిసి వినతిపత్రం సమర్పించారు. రెండు గ్రాడ్యుయేట్ ఎమ్మెల్సీ నియోజకవర్గాల ఓటర్ల నమోదుపై స్పష్టత ఇవ్వాలని కోరారు.
మహబూబ్నగర్-రంగారెడ్డి-హైదరాబాద్, వరంగల్-ఖమ్మం-నల్గొండ నియోజకవర్గాలకు కొత్త ఓటర్ల జాబితా రూపొందించనున్నారు. సెప్టెంబర్ 28 నుంచి ఫారం-18 దరఖాస్తుల స్వీకరణ ప్రారంభం కానుంది. నవంబర్ 6 వరకు దరఖాస్తులు స్వీకరిస్తారు.
అయితే, ఓటర్ల జాబితా ప్రక్రియలోని గడువులపై బీఆర్ఎస్ నేతలు సందేహాలు వ్యక్తం చేశారు. నవంబర్ 1, 2026ను అర్హత తేదీగా నిర్ణయించగా, నవంబర్ 6 వరకు ఫారం-18 దరఖాస్తులు తీసుకుంటారని పేర్కొన్నారు. ఈ షెడ్యూల్ ఇతర ఓటర్ల సవరణ ప్రక్రియతో ఎలా సమన్వయం అవుతుందో స్పష్టత ఇవ్వాలని కోరారు.
మరోవైపు, నవంబర్ 25న ముసాయిదా ఓటర్ల జాబితాను ప్రకటించనున్నారు. అదే రోజు నుంచి డిసెంబర్ 10 వరకు క్లెయిమ్లు, అభ్యంతరాలు స్వీకరిస్తారు. డిసెంబర్ 30న తుది ఓటర్ల జాబితాను ప్రకటించనున్నారు. ఇప్పటికే ఓటరుగా ఉన్న పట్టభద్రులు కూడా కొత్తగా ఫారం-18 సమర్పించాల్సి ఉంటుందని ఎన్నికల అధికారులు స్పష్టం చేశారు.
ఇక ఎలాంటి గందరగోళం లేకుండా స్పష్టమైన విధానాన్ని ప్రకటించాలని బీఆర్ఎస్ ప్రతినిధులు కోరారు. అవసరమైతే గడువులను సవరించాలని విజ్ఞప్తి చేశారు. అర్హులైన పట్టభద్రులు ఇబ్బందులు లేకుండా ఓటర్లుగా నమోదు చేసుకునేలా చర్యలు తీసుకోవాలని కోరారు.