D News: **నాని–శ్రీకాంత్ ఓదెల కాంబినేషన్లో తెరకెక్కుతున్న ‘ది ప్యారడైజ్’**పై అంచనాలు రోజురోజుకూ పెరుగుతున్నాయి. ‘దసరా’ తర్వాత ఈ కాంబో నుంచి వస్తున్న సినిమా కావడంతో భారీ హైప్ నెలకొంది. అయితే ఈ సినిమా విషయంలో దర్శకుడు శ్రీకాంత్ ఓదెల తీసుకున్న కొన్ని నిర్ణయాలు షూటింగ్, ప్రొడక్షన్ షెడ్యూల్పై ప్రభావం చూపించాయి. తాజాగా ప్రమోషనల్ చిట్చాట్లో ఆయన ఈ విషయాలపై ఆసక్తికరంగా స్పందించారు.
ప్రేక్షకుల విషయంలో ఎక్కడా రాజీ పడలేదట..
‘ది ప్యారడైజ్’ కోసం తాను ప్రేక్షకుల విషయంలో చాలా జాగ్రత్తగా ఉన్నానని శ్రీకాంత్ ఓదెల చెప్పుకొచ్చారు. థియేటర్కు వచ్చే ప్రతి ఒక్కరూ సంతృప్తిగా బయటకు వెళ్లాలన్నదే తన లక్ష్యమని, అందుకే సినిమాలోని చిన్న చిన్న విషయాల విషయంలోనూ రాజీ పడలేదని తెలిపారు. ఈ కారణంగానే కొన్ని పనులు అనుకున్న సమయం కంటే ఆలస్యమయ్యాయని, దాని ప్రభావం ప్రొడక్షన్ ఖర్చులు, ఆర్టిస్టుల కాల్షీట్లపైనా పడిందని వివరించారు.
‘దసరా’ సమయంలో తనకు బిజినెస్, ప్రేక్షకుల అంచనాలు వంటి విషయాలపై పెద్దగా అవగాహన లేదని ఓదెల గుర్తుచేసుకున్నారు. అప్పట్లో సినిమా తీయడంపైనే తన దృష్టి ఉండేదని, మిగతా విషయాలను నాని, నిర్మాత సుధాకర్ చెరుకూరి చూసుకునేవారని చెప్పారు.
‘దసరా’తో పోలిస్తే ఈసారి బాధ్యత ఎక్కువ
‘ది ప్యారడైజ్’ విషయానికి వస్తే పరిస్థితులు పూర్తిగా మారిపోయాయని దర్శకుడు తెలిపారు. ‘దసరా’తో వచ్చిన భారీ విజయంతో ఈ సినిమాపై ప్రేక్షకుల్లో అంచనాలు పెరిగాయి. ప్రతి ఫ్రేమ్ విషయంలోనూ ఆ బాధ్యత తనపై ఉందనే భావనతో పనిచేస్తున్నట్టు వెల్లడించారు.
ఇక ‘ది ప్యారడైజ్’లోని డబ్బింగ్, సౌండ్ వంటి టెక్నికల్ అంశాలను ప్రేక్షకుల స్పందనకు అనుగుణంగా మెరుగుపరుచుకునే విధానంపై కూడా చర్చ జరిగింది. ఈ విషయంలో శ్రీకాంత్ ఓదెల, నాని నుంచి తాను చాలా నేర్చుకున్నానని నటుడు రాఘవ్ జుయల్ పేర్కొన్నారు.
నాని, కాయదు లోహర్, రాఘవ్ జుయల్, మోహన్ బాబు, సోనాలి కులకర్ణి తదితరులు కీలక పాత్రల్లో నటిస్తున్న ఈ సినిమాకు అనిరుధ్ రవిచందర్ సంగీతం అందిస్తున్నారు. SLV సినిమాస్ బ్యానర్పై సుధాకర్ చెరుకూరి నిర్మిస్తున్న ఈ సినిమా సెప్టెంబర్ 24న ప్రపంచవ్యాప్తంగా థియేటర్లలోకి రానుంది.